.gif)
कर्मचारी सञ्चय कोषले सोमबार आफू स्थापनाको ६३ औं वार्षिकोत्सव मनाएको छ ।
सो अवसरमा कार्यक्रममा प्रमुख अतिथि अर्थमन्त्री विष्णु पसाद पौडेलले कर्मचारी सञ्चय कोषले सामाजिक सुरक्षाका योजनामा सरकारलाई गरिरहेको सहयोगको लागि धन्यवाद दिंदै कोषलाई औसत गतिमा सीमित नभई सञ्चयकर्ताको भरोसालाई विश्वासमा लिनुपर्ने बताएका छन् । उनले सञ्चयकर्ताहरुको दायरा विस्तार गर्ने र आकर्षण वढाउने किसिमका कार्याक्रमलाई प्राथमिकता दिनुपर्ने पनि बताए ।
त्यस्तै अर्थ मन्त्रालयका राजस्व सचिव तथा कोष सञ्चालक समिति अध्यक्ष दिनेश कुमार घिमिरेले वित्तीय स्रोत परिचालन गर्ने क्षमताको सह्राहना गर्दै कोषको वित्तीय सक्षमताको आधारमा सञ्चयकर्ताहरुलाई अधिकतम लाभ दिन किसिमले काम गर्न अनुरोध आग्रह गरे ।
कार्यक्रमका कोषका पूर्व प्रशासकहरु रमेश कुमार भट्टराई र शंशारभक्त श्रेष्ठले कर्मचारी सञ्चय कोषले लगानी विविधिकरणको माध्यमबाट जलविद्युत् र सञ्चयकर्ता आवसको क्षेत्रमा गरेको लगानीको प्रशंसा गर्दै थप नयाँ लगानीका क्षेत्र खोज्नुपर्ने बताए ।
त्यस्तै अन्तरराष्ट्रिय सामाजिक सुरक्षण संस्थाका अध्यक्ष डा मोहम्मद अजमानले भिडियो सन्देश पठाउँदै सामाजिक सुुरक्षाको क्षेत्रमा कोषले छ दशकदेखि पु¥याउँदै आएको योगदानको कदर गर्दै सामाजिक संरक्षणको क्षेत्रमा कोषसँग मिलेर काम गर्न तयार रहेको बताए ।
कार्यक्रममा कोषका प्रशासक जितेन्द्र धितालले कोषको समग्र अवस्थाको जानकारी गराउँदै कोषलाई सरकारी तथा सार्वजनिक क्षेत्रको सामाजिक सुरक्षा प्रदायक संस्थाको रुपमा स्थापित गर्ने बताए । उनले सञ्चयकर्ता तथा योगदानकर्ताको योगदान रकमको कुशल व्यवस्थापन तथा परिचालन, प्राप्त प्रतिफलको न्यायोचित वितरण र सेवा प्रवाहमा गुणात्मक सुधार गर्दै सेवाग्राहीकोे हित र सन्तुष्टिप्रति कोष परिवार सदैव क्रियाशील रहि रहने पनि बताए ।
सो अवसरमा कोषले निजामती, जंगी र प्रहरी सेवातर्फका कर्मचारीहरुका साथै शिक्षक, सार्वजनिक संस्थान तथा निजी प्रतिष्ठानका कर्मचारीसमेत गरी ५ लाख ७५ हजारभन्दा बढी सञ्चयकर्ताको करिब ६ खर्ब रुपैयाँ बराबरको रकम व्यवस्थापन गरिरहेको जानकारी दिइएको थियो । स्थापना कालदेखि सञ्चय कोषको मात्र व्यवस्थापन गर्दै आएको कोषले २०७६ साल यता निवृत्तभरण कोष ऐन, २०७५ बमोजिम योगदानमा आधारित निवृत्तभरण कोषको समेत व्यवस्थापन गर्दै आइरहेको छ ।
कोषले योगदानकर्ताहरुको सेवाकालिन आवश्यकता पुरा गर्न विशेष सापटी, घर सापटी, शैक्षिक सापटी जस्ता ६ किसिमका सापटी सुविधाहरुलाई सहुलियत दरमा प्रदान गर्दै आएको छ ।
सामाजिक सुरक्षा सुविधातर्फ प्रसुती तथा शिशु स्याहार, काजक्रिया अनुदान, दुर्घटना क्षतिपूर्ति योजना तथा सञ्चयकर्ता तथा निजको श्रीमान वा श्रीमतीको लागि औषधोपचार सुविधालगायत चार प्रकारका सुविधाहरु सञ्चयकर्ताहरुलाई निःशुल्क रुपमा प्रवाह गर्दै आइरहेको छ ।
कर्मचारी सञ्चय कोषले सञ्चयकर्ताहरुबाट संकलन गरिएको दीर्घकालीन रकमलाई सुरक्षित, प्रतिफलयुक्त एवम् दिगो लगानी गरी प्राप्त प्रतिफलको न्यायोचित वितरणबाट सञ्चयकर्तालाई सन्तुष्टि दिने मूल उद्देश्य राखी लगानी व्यवस्थापन गर्दै आइरहेको बताएको छ । कोषको संकलित स्रोत मध्ये करिब ९७ प्रतिशत अर्थात् ५ खर्ब ५१ अर्ब रकम विभिन्न क्षेत्रमा लगानी गरेको छ ।
कोषले विभिन्न क्षेत्रको लगानीवाट प्राप्त प्रतिफललाई सञ्चयकर्ताको हितमा लगाउदै आएकोमा आर्थिक वर्ष २०७९/८० मा प्राप्त प्रतिफलवाट सञ्चयकर्ताको जम्मा भएको कोष रकममा १.१० प्रतिशतका दरले मुनाफा वितरण पनि गरेको छ ।
कोषको दीर्घकालीन वित्तीय स्रोतलाई आवास, विद्युत विका तथा पूर्वाधार क्षेत्रका ठूला एवम् वित्तीय रुपले सम्भाव्य परियोजनाहरुमा लगानी गर्ने नीतिलाई आगामी दिनमा पनि निरन्तरता दिने उल्लेख गरेको छ ।
