आरम्भ चौतारी लघुवित्त वित्तीय सँस्था लिमिटेड र देउराली लघुवित्त वित्तीय सँस्था लिमिटेडले कार्तिक ३० गतेबाट एकिकृत कारोबार गर्ने भएका छन् । आरम्भ चौतारीले देउराली लघुवित्तलाई गाभेपछि आरम्भ चौतारी लघुवित्त वित्तीय सँस्थाको नामबाट एकिकृत कारोबार हुने राष्ट्र बैंकले जनाएको छ।
बनेपा -१० काभ्रेपलान्चोक केन्द्रिय कार्यलय रहेको आरम्भ चौतारी लघुवित्त वित्तीय सँस्थाले बुटवल ४ रुपन्देही केन्द्रिय कार्यलय रहेको देउराली लघुवित्लाई प्राप्ति गरेको हो। प्राप्ति पश्चात बन्ने लघुवित्तको नाम 'आरम्भ चौतारी लघुवित्त' रहनेछ भने यसको केन्द्रिय कार्यलय बनेपा नगरपालिका १० मा रहनेछ। राष्ट्रिय स्तरको लघुवित्तको हैसियतले देशभर लघुवित्त सेवा प्रदान गर्नेछ।
राष्ट्र बैंकले तोकेको सर्तअनुसार आरम्भ चौतारी लघुवित्त वित्तीय सँस्था र देउराली लघुवित्त वित्तीय सँस्थाको स्वाप अनुपात १००: ८४ हुनुपर्नेछ। नेपाल राष्ट्र बैंकले दुवै लघुवित्तलाई यहि कात्तिक १ गते प्राप्तिको लागि अन्तिम स्वीकृति दिएको हो।
राष्ट्र बैंकद्वारा जारी सूचनामा भनिएको छ 'यस बैंकको सञ्चालक समितिको निर्णयानुसार साविकको इजाजतपत्रप्राप्त आरम्भ चौतारी लघुवित्त वित्तीय संस्था लिमिटेडले इजाजतपत्र प्राप्त वित्तीय संस्था देउराली लघुवित्त वित्तीय संस्था लिमिटेडलाई सो संस्थाको सम्पर्ण सम्पत्ति तथा दायित्व आफमा सर्ने गरी प्राप्ति (एक्विजिशन) गरी मिति २०७८/०७/३० मंगलबारका दिनदेखि साविकका दुवै संस्थाबाट सञ्चालन हुँदै आएको सम्पूर्ण वित्तीय कारोबार एकीकृत रूपमा "आरम्भ चौतारी लघुवित्त वित्तीय संस्था लिमिटेड को नामबाट सञ्चालन गर्ने भएकाले “बैंक तथा वित्तीय संस्था एक आपसमा गाभ्ने/गाभिन (मर्जर) तथा प्राप्ति (एक्विजिशन) सम्बन्धी विनियमावली, २०७३ (चौथो संशोधन, २०७५)" को विनियम ११ को उप-विनियम (७) बमोजिम सर्वसाधारणको जानकारीका लागि यो सूचना प्रकाशित गरिएको छ।'
