संसदमा महाअभियोग प्रस्ताव दर्ता भएपछि स्वतः निलम्बनमा परेकी प्रधानन्यायधीश सुशीला कार्कीले आफू महाअभियोगबाट नडराएको प्रतिक्रिया दिएकी छिन् । उनले भनिन्, ‘मलाई त केही फिल नै भएको छैन । ममाथि महाअभियोग लाग्दै छ भन्ने मलाई थाहा थियो ।’ उनीसँगको छोटो संवाद आजकाे नागरिक दैनिकमा छापिएको छ ।
तपाईंमाथि लागेको महाअभियोगलाई कसरी लिनुभएको छ ?
मलाई त केही फिल नै भएको छैन । ममाथि महाअभियोग लाग्दै छ भन्ने मलाई थाहा थियो । केही दिनयता माओवादी सांसद (रामनारायण) विडारीले मलाई पटक पटक फोन गरी कांग्रेसको दबाब आइरहेको छ । एक पटक भेट्नुपर्यो भनिरहनु भएको थियो । तर मैले भेट्न मानिन ।
विडारीलाई मैले महाअभियोग लगाउनुस् भनेको थिएँ । आनन्दमोहन (भट्टराई) लाई गरेजस्तै मलाई पनि गरेका हुन् ।प्रधानमन्त्रीले आजै बिहान पनि दूत बनाएर बर्षमान पुनलाई मेरो निवासमा पठाउनुभएको रहेछ तर, मैले भेटिनँ । मेरो श्रीमान सँग भेटेर उहाँ फर्किनुभयो ।
उहाँहरुले मलाई जे आरोप लगाएर महाअभियोग दर्ता गर्नुभएको छ त्यो त उहाँहरुले पुष्टि गर्नुपर्छ ।तर मैले न्यायप्रतिको निष्ठा र इमान्दारीतामा कहिल्यै सम्झौता गरेकी छैन । त्यसैले म यसबाट डराएकी छैन । म यो प्रस्तावको सामना गर्छु ।
