नेपाल उद्योग वाणिज्य महासंघका अध्यक्ष शेखर गोल्छाले सहकारीहरुलाई कडा रुपमा नियमन गर्नु पर्ने बताएका छन् । राष्ट्रिय स्वतन्त्र पार्टीका सांसदहरुसँग अर्थतन्त्रबारे गरिएको अन्तरक्रिया कार्यक्रममा अध्यक्ष गोल्छाले सहकारीलाई कडा नियमन गर्नु पर्ने बताएका हुन् ।
अध्यक्ष गोल्छाले सहकारीमा राजनीति छिरेपछि समस्या बढेको र सहकारीको नियमन नभएको कारणले नै ५० लाख बचतकर्ता मारमा पर्ने अवस्था आएको बताए । उनले ४० हजार सहकारीको कडा नियमन गर्नु पर्ने बताए ।
त्यस्तै अध्यक्ष गोल्छाले आर्थिक नीति र मौद्रिक नीतिबीच तालमेल नहुँदा अर्थतन्त्रमा समस्या परेको बताए । निजि क्षेत्रको मनोबल घटेको उल्लेख गर्दै उनले त्यसको कारण राजस्व २५ प्रतिशत घटेको जानकारी दिए ।
ब्याजदर बढेको, तरलता अभाव रहेको, औपचारिक क्षेत्रबाट धेरै रोजगारी गुमेको, निर्माण सामग्रीको ५० प्रतिशत व्यवसाय घटेको , अटोमोबाइल्समा कमर्सियल भेहिकलको व्यवसाय ९० प्रतिशत घटेको लगायत अनेक समस्यामा अर्थतन्त्र रहेको उनले बताए ।