नेपाल स्टक एक्सचेन्ज नेप्सेमा स्ट्याण्डर्ड चार्टड बैंक Standard Chartered Bank Nepal Limited को शेयर मूल्य समायोजन भएको छ । बैंकले साधारणसभाको लागि आज बुक क्लोज गर्ने निर्णय गरेकोले कम्पनीको ७ प्रतिशत बोनसमा मूल्य समायोजन भएको हो ।
समायोजनपछि बैंकको शेयर मूल्य प्रति कित्ता ६१२ कायम भएको छ । समायोजन अगाडी बैंकको शेयर मूल्य प्रति कित्ता ६५५ थियो । बैंकले साधारणसभा प्रयोजनको लागि पुस ९ देखि पुस २४ गतेसम्म बुक क्लोज गर्ने निर्णय गरेको हो। पुस ८ गतेसम्म कायम शेयरधनीले मात्र सभामा भाग लिन र प्रस्तावित लाभांश पाउन सक्ने छन् ।
कम्पनीले पुस २४ गते बिहान नयाँ बानेश्वर स्थिति एभरेष्ट होटेलमा सभा आह्वान गरेको हो । बैंकले सभामा भौतिक रुपमा बढीमा २५ जना र अन्यलाई भर्चुअल माध्यमबाट सहभागी गराउने गरि सभा आह्वान गरेको हो ।
सभामा लाभांश सहितका विविध प्रस्ताव पेश हुने छन् । बैंकले आर्थिक ७६/७७ सम्मको मुनाफाबाट ७ प्रतिशत बोनस र कर प्रयोजन सहित ४.८४ प्रतिशत नगद गरि ११ .८४ प्रतिशत लाभांश प्रस्ताव गरेको छ । बार्षिक साधारण सभाले पारित गरे पश्चात सेयरधनीहरुमा उक्त लाभांश वितरण हुनेछ ।
त्यस्तै सभामा संचालक समितिका अध्यक्षको प्रतिवेदन उपर छलफल गरि पारित गर्ने, लेखापरीक्षक प्रतिवेदन उपर छलफल गरि पारित गर्ने, लेखापरीक्षक नियुक्त गरि निजको पारिश्रमिक तोक्ने, प्रबन्धकपत्र र नियमावलीमा आवश्यक संशोधन गर्ने, र थप संशोधन गर्नु परे सो को अख्तियारी संचालक समितिलाई प्रदान गर्ने प्रस्ताव पेश हुने छन् ।
