नेपाल स्टक एक्सचेन्ज नेप्सेमा नेपाल लाइफ इन्स्योरेन्स Nepal Life Insurance Company को शेयर मूल्य समायोजन भएको छ । कम्पनीको ३१ प्रतिशत बोनसमा मूल्य समायोजन भएको हो ।
समायोजनपछि कम्पनीको शेयर मूल्य प्रति कित्ता २१९२ कायम भएको छ । समायोजन अघि कम्पनीको शेयर मूल्य २८७२ थियो । कम्पनीले साधारणसभा प्रयोजनको लागि माघ १४ देखि माघ २८ गतेसम्म बुक क्लोज गर्ने निर्णय गरेकोले आज माघ १४ गते कम्पनीको शेयर मूल्य समायोजन भएको हो । माघ १३ गतेसम्म कायम शेयरधनीले सभामा भाग लिन र प्रस्तावित लाभांश पाउन सक्ने छन् ।
कम्पनीले माग २८ गते बुधबार बिरगंजमा सभा आह्वान गरेको छ । सभामा लाभांश सहितका विभिन्न प्रस्ताव पेश हुने छन् । कम्पनीले आर्थिक वर्ष ७५/७६ को मुनाफाबाट ३१ प्रतिशत बोनस शेयर र २० प्रतिशत नगद लाभांश गरि कुल ५१ प्रतिशत लाभांश वितरण गर्ने प्रस्ताव गरेको छ । साधारणसभाले पारित गरेपछि उक्त लाभांश लगानीकर्तामा वितरण हुने छ ।
त्यस्तै सभामा अध्यक्षको प्रतिवेदन उपर छलफल गरि पारित गर्ने, लेखापरीक्षकको प्रतिवेदन उपर छलफल गरि पारित गर्ने, प्रबन्धपत्र नियमावलीमा आवश्यक संशोधन गर्ने, लेखापरीक्षकको नियुक्ति गरि निजको पारिश्रमिक तोक्ने, त्यस्तै सभाले सर्बसाधारण शेयरधनीबाट प्रतिनिधित्व गर्ने २ जना संचालकको निर्वाचन गर्ने लगायतका प्रस्ताव पेश हुने छन् ।
त्यस्तै सभामा कम्पनीको प्रति शेयर मूल्य हाल एक सय रुपैयाँ रहेकोमा त्यसलाई ५० रुपैयाँ कायम गर्ने प्रस्ताव पेश हुने भएको छ । यद्यपि यो प्रस्ताव नियामक निकायले स्वीकृति दिएमा मात्र लागु हुने कम्पनीले जनाएको छ ।
