.gif)
नेपाल धितोपत्र बोर्डले विभिन्न कम्पनीहरुको हकप्रद तथा आइपिओ निष्काशनको अनुमति माग गर्दै बोर्डमा पेश गरिएका आवेदन रद्द गरेको छ । सार्वजनिक निष्काशनको प्रक्रिया अगाडी बढाएका तर बोर्डले माग गरेका कागजात तथा विवरणहरु समय मै उपलब्ध नगराएका कम्पनीको आवेदन रद्द गरिएको बोर्डले जनाएको छ ।
यस संगै बोर्डको वेबसाइटमा हकप्रदको लागि पाईपलाइनमा रहेका एचआईडिसीएसल, बरुण हाइड्रो, ङादी हाइड्रोको नाम सुचिबाट हटिसकेको छ । बोर्डका अनुसार यी कम्पनीहरुले बोर्डले माग गरेको आवश्यक कागजातहरु ६ महिना बिती सक्दा पनि पेश नगरेकोले आवेदन रद्द गरिएको हो । बोर्डका सहायक प्रवक्ता रुपेश केसीका अनुसार बोर्डले कमेन्ट पठाएको ६ महिना वा सो भन्दा बढी समयसम्म पनि कुनै जवाफ नदिएका कम्पनीको हकप्रद आवेदन रद्द गरिएको हो । उनका अनुसार अब ति कम्पनीले हकप्रद निष्काशन गर्नको लागि सुरु देखि नै प्रक्रिया अगाडी बढाएर आवेदन दिनु पर्ने छ ।
बोर्डले पाएपलाइनको सुचिबाट एचआईडिसीएसल, बरुण हाइड्रो, ङादी हाइड्रोको नाम हटाएपछि अहिले हकप्रदको पाईपलाइनमा कर्पोरेट डेभलपमेन्ट बैंक, र अरुण भ्याली हाइड्रो मात्र रहेका छन् ।
बोर्डले हकप्रदमा मात्र नभई आईपिओ, ऋणपत्र, एफपिओ, लगायतका सार्वजनिक निष्काशनमा यहि प्रक्रिया अपनाउने भएको छ । जस अनुसार बोर्डले आईपिओ निष्काशनको लागि अनुमति माग गर्दै आवेदन दिएका तर बोर्डले कमेन्ट पठाएको ६ महिनासम्म पनि केहि जवाफ नदिएका कम्पनीको आवेदन पनि रद्द गरिएको बोर्डले जनाएको छ । यस संगै उनीहरुले अझै आईपिओ निष्काशन गर्न चाहेमा फेरी आवेदन दिएर नयाँ प्रक्रिया थालनी गर्नु पर्ने छ ।
बोर्डका अनुसार ऋणपत्र र म्युचुअल फण्डमा यस्तो समस्या नदेखिए पनि आईपिओ र हकप्रदमा समस्या देखिएको हो । सोहि कारण बोर्डले हकप्रद र आईपिओको पाइपलाइनमा रहेका र ६ महिनासम्म कुनै जवाफ नदिएका कम्पनीहरुको आवेदन रद्द गरेको हो ।
