अरुण भ्याली हाइड्रोपावर Arun Valley Hydropower Development Company ले हकप्रद निष्काशन प्रयोजनको लागि बुक क्लोज मिति तय गरेको छ । कम्पनीले हकप्रद निष्काशन प्रयोजनको लागि चैत्र ९ गते १ दिन बुक क्लोज गर्ने निर्णय गरेको हो ।
यस संगै चैत्र ८ गते गतेसम्म कायम शेयरधनीले मात्र हकप्रदमा आवेदन दिन सक्ने छन्। नेपाल धितोपत्र बोर्डले आज फागुन २५ मा कम्पनीलाई हकप्रद निष्काशनको लागि अनुमति प्रदान गरेको हो ।
कम्पनीले १:०५ को अनुपातमा ५० प्रतिशत हकप्रद निष्काशनको अनुमति पाएको हो । यस संगै अब कम्पनीले ५२ करोड ४१ लाख १९ हजार ७ सय रुपैयाँ बराबरको ५२ लाख ४१ हजार १ सय ९७ कित्ता हकप्रद शेयर निष्काशन गर्ने छ । शेयर निष्काशनको लागि मुक्तिनाथ क्यापिटल बिक्रि प्रबन्धक रहेको छ ।
कम्पनीले १:१ को अनुपातमा शतप्रतिशत हकप्रद निष्काशन प्रस्ताव गरेपनि विद्युत नियम आयोगले कम्पनीलाई २ चरणमा हकप्रद निष्काशन गर्ने अनुमति प्रदान गरेको थियो । हालको ५० प्रतिशत हकप्रद निष्काशनपछि कम्पनीले फेरी दोस्रो चरणको हकप्रद निष्काशन गर्ने छ ।
कम्पनीले आफुले निर्माण गर्न लागेको २ वटा आयोजनाको लागि रकम जुटाउन हकप्रद निष्काशन गर्न लागेको हो । हकप्रद शेयर मार्फत उपलब्ध भएको रकमलाई कम्पनीले काबेली बी १ जलविद्युत आयोजना र अपर काबेली २ जलविद्युत आयोजना गरी कुल २३.५ मेगावाट आयोजनाको निर्माण कार्यमा उपयोग गर्ने जनाएको छ ।
