नेपाल स्टक एक्सचेन्ज नेप्सेले किसान लघुवित्त (साविकको एनआरनएन) लघुवित्तको कारोबार रोक्का राख्दै ३ दिने स्पष्टिकरण सोधेको छ । कम्पनीले साधारणसभामा सूचना प्रकाशित गर्दा अघिल्लो दिन हकप्रद प्रस्ताव गरेको तर दोस्रो दिन त्यसलाई संशोधन गर्दै हकप्रद प्रस्ताव हटाएपछि नेप्सेले स्पष्टिकरण सोधेको हो ।
नेप्सेले मूल्यमा प्रभाव पार्ने सुचना समयमा किन नदिएको र किन हकप्रद प्रस्ताव गरि संशोधन गरेको भन्दै ३ दिने स्पष्टिकरण सोधेको हो । नेप्सेले सूचना परिवर्तन गर्नुको कारण सहित स्पष्टिकरण पेश गर्न भनेको हो । नेप्सेले संचालक समितिले हकप्रदको निर्णय गरेको भए किन त्यसको जानकारी नदिएको भन्ने विषयमा जवाफ माग गरेको छ ।
कम्पनीले आइतबार सूचना प्रकाशित गर्दै १:१ अनुपातमा शतप्रतिशत हकप्रद निष्काशन प्रस्ताव साधारणसभामा लैजाने उल्लेख गरेको थियो । तर सोमबार कम्पनीले संशोधित सूचना प्रकाशित गर्दै हकप्रद प्रस्ताव हटाएको थियो ।
कम्पनीले हकप्रद निष्काशन प्रस्ताव सहित साधारणसभा आह्वान गरेपछि आइतबार कम्पनीको शेयर मूल्य ९.९७ प्रतिशत अर्थात् १५७ रुपैयाँले बढेर प्रति कित्ता १७३१ रुपैयाँ पुगेको थियो । कम्पनीले हकप्रद प्रस्ताव हटाएसंगै हकप्रदको आशमा महँगो मूल्यमा शेयर खरिद गर्ने लगानीकर्ता मारमा परेका छन् ।
कम्पनीले मूल्य बढाउँन कै लागि हकप्रद प्रस्ताव गरेको देखिन्छ । जबकी नेपाल राष्ट्र बैंकले लघुवित्त कम्पनीहरुलाई हकप्रद निष्काशनमा रोक लगाएको छ । कम्पनीले साधारणसभाको सूचनामा चैत्र ६ मा बसेको संचालक समितिको निर्णय भनी उल्लेख गरेको छ । अर्थात् हकप्रद प्रस्ताव हटाउनु अघि संचालक समितिको बैठक बसेर थप निर्णय भएको देखिदैन । हकप्रदको नाममा यसरी चलखेल हुँदा यसको मारमा भने लगानीकर्ता परेका छन् ।
कम्पनीले लाभांश प्रस्ताव गरेको छैन ।