.gif)
किसान लघुवित्त (साविकको एनआरनएन) लघुवित्तले स्पष्टिकरण पेश गरेको छ । कम्पनीले हकप्रदको सूचना सच्याएको र समयमा नै सूचना नदिएको विषयमा नेप्सेले स्पष्टिकरण सोधेपछि कम्पनीले स्पष्टिकरण पेश गरेको हो ।
स्पष्टिकरणमा कम्पनीले पुँजी बढाउँन हकप्रद प्रस्ताव गरेको तर यस विषयमा सम्बन्धित निकायसँग परामर्श गरेर अगाडी बढ्ने निर्णय भएको कम्पनीले उल्लेख गरेको छ । तर साधारणसभा हुनु भन्दा २१ दिन अगाडी साधारणसभा आह्वान गर्नु पर्ने ब्यबस्था भएको तथा सो दिन विदा परेको परामर्श गर्न नसकिएकोले हकप्र प्रस्ताव सहितको सूचना प्रकाशन गरेको कम्पनीले उल्लेख गरेको छ ।
दोस्रो दिन राष्ट्र बैंकसँग परामर्श गर्दा हकप्रद प्रस्ताव हटाउन सुझाव आएकोले हकप्रद प्रस्ताव हटाएर सूचना प्रकाशित भएको तथा दोस्रो पटक प्रकाशित सूचना आधिकारिक हुने कम्पनीले उल्लेख गरेको छ ।
त्यस्तै कम्पनीले लग ईन आइडीको समस्याको कारण समयमा नै नेप्सेलाई जानकारी गराउन नसकिएको जनाएको छ । निर्णय भएको दिनमा विदा भएको, त्यसको भोलिपल्ट निर्णय अपलोड गर्न खोज्दा आफुसँग कम्पनीको पुरानो नामको मात्र लग ईन आइडी मात्र भएको, र त्यसले काम नगरेको कम्पनीले उल्लेख गरेको छ । त्यस्तै नेप्सेसँग नयाँ नामको लगईन आइडी लिनजाँदा ढिला भएको र नयाँ आईडी पाउना साथ सूचना अपलोड गरेको कम्पनीले दाबी गरेको छ ।
कम्पनीले हकप्रद प्रस्ताव सहितको सूचना प्रकाशन गर्दा शेयर मूल्यमा प्रभाव पार्ने कुनै पनि मनशाय नभएको र सबै कुरा मानवीय त्रुटीको कारण भएको जिकिर गरेको छ । कम्पनीले यसबाट सबैमा पर्न गएको असर प्रति क्षमायाचना गर्दै आगामी दिनमा यस्ता कमीकमजोरी नदोहोर्याउने प्रतिबद्दता समेत व्यक्त गरेको छ ।
लघुवित्तले एक दिन पनि नबित्दै साधारणसभाको सूचना संशोधन गरेर हकप्रद निष्काशन गर्ने प्रस्ताव हटाएको थियो । कम्पनीले गत आइतबार सूचना प्रकाशित गर्दै १:१ अनुपातमा शतप्रतिशत हकप्रद निष्काशन प्रस्ताव साधारणसभामा लैजाने उल्लेख गरेको थियो । तर सोमबार कम्पनीले संशोधित सूचना प्रकाशित गर्दै हकप्रद प्रस्ताव हटाएको थियो ।
कम्पनीले हकप्रद निष्काशन प्रस्ताव सहित साधारणसभा आह्वान गरेपछि आइतबार कम्पनीको शेयर मूल्य ९.९७ प्रतिशत अर्थात् १५७ रुपैयाँले बढेर प्रति कित्ता १७३१ रुपैयाँ पुगेको थियो । कम्पनीले हकप्रद प्रस्ताव हटाएसंगै हकप्रदको आशमा महँगो मूल्यमा शेयर खरिद गर्ने लगानीकर्ता मारमा परेका छन् ।
हाल नेप्सेले कम्पनीको शेयर कारोबार रोक्का गरेको छ ।
