मर्जरको लागि बन्द रहेको एनआईसी एसिया लघुवित्त NIC ASIA Laghubitta Bittiya Sanstha को शेयर कारोबार बुधबारबाट सुचारु हुने भएको छ । एनआईसी एसिया लघुवित्त र स्वदेशी लघुवित्त Swadeshi Laghubitta Bittiya Sanstha मर्ज भएपछि बुधबारबाट एनआईसी एसिया लघुवित्तको नामबाट साविक कै NICLBSL सिम्बल मार्फत शेयर कारोबार सुचारु हुने भएको हो ।
आज कम्पनीको मर्जरपछि हुन आएको थप शेयर सुचिकृत भएको छ । आज कम्पनीको २५ लाख ९४ हजार कित्ता शेयर सुचिकृत भएको हो । यस संगै कम्पनीको कुल सुचिकृत शेयर संख्या १ करोड ७३ लाख ९४ हजार ४ सय कित्ता पुगेको छ । कम्पनीको यस अघि नै १ करोड ४८ लाख कित्ता शेयर सुचिकृत भएको थियो । मर्जरपछिको पहिलो कारोबारको लागि नेप्सेले ७६५.१२ को सुरुवाती रेन्ज तोकेको छ । पहिलो दिन यो मूल्यलाई सुरुवाती मूल्य मानेर शेयर कारोबार हुनेछ। अर्थात् पहिलो दिन यो मूल्यबाट कम्पनीको शेयर मूल्य १० प्रतिशतसम्म घटबढ हुन सक्ने छ ।
यी दुई संस्था १००:९४ को स्वापमा अर्थात स्वदेशीको १०० कित्ता शेयर हुनेले एनआईसी एसिया लघुवित्तको ९४ कित्ता शेयर पाउने गरि मर्ज भएका थिए । मर्जरको लागि कारोबार रोक्का हुनु अगाडी एनआईसी एसिया लघुवित्तको अन्तिम शेयर मूल्य ७५९ थियो भने स्वदेशीको शेयर मूल्य ८०० थियो ।
मर्जरपछि २ संस्थाले चैत्र ८ गतेबाट एनआईसी एसिया लघुवित्तको नामबाट एकिकृत वित्तीय कारोबार सुरु गरेका थिए। यी दुई संस्थाबीच गत श्रावण ३२ गते गाभ्ने ÷गाभिने मर्जर सम्बन्धी समझदारीपत्रमा हस्ताक्षर भएको थियो भने कार्मितिक १९ गते नेपाल राष्ट्र बैंकबाट सैद्धान्तीक सहमति प्राप्त गरेका थिए । पुस १० गते गाभ्ने÷गाभिने (मर्जर) गर्ने सम्बन्धी अन्तीम सम्झौता भई सो अन्तीम सम्झौता अनुसार गाभ्ने÷गाभिने (मर्जर) गर्नेका लागि दुबै संस्थाको माघ ४ गतेको छुट्टाछुट्टै बार्षिक साधारण सभाबाट प्रस्ताव पारित भएको थियो।
मर्जर अघि एनआईसी एशिया लघुवित्तको १५० शाखा थिए भने स्वदेशी लघुवित्तको ८५ शाखा थिए । मर्जर पश्चात कुल शाखा संख्या २२३ कायम भएको छ। कम्पनीका अनुसार मर्जर पश्चात संस्थाको पुँजी १ अर्ब ७३ करोड ९४ लाख ४० लाख पुग्नेछ भने संस्थाको कर्जा लगानी १५ अर्ब भन्दा माथि पुग्नेछ । मर्जर पश्चात एनआईसी एसिया लघुवित्त देशकै सबै भन्दा ठूलो शाखा संजाल र चुक्ता पूँजी भएको लघुवित्तको रुपमा स्थापित हुने कम्पनीले जनाएको छ ।
कम्पनीले वित्तीय समावेशिकरणका लागि डोटी, जुम्ला, जाजरकोट, सल्यान, रसुवा, सिन्धुपाल्चोक जस्ता बैंक तथा वित्तीय संस्थाहरुको उपस्थिति न्युन रहेको दुर्गम जिल्लाहरुमा शाखा विस्तार गरी सेवा सञ्चालन गर्दै आएको जनाएको छ ।
