नेपाल स्टक एक्सचेन्ज नेप्सेको अध्यक्ष लक्ष्मण न्यौपानेको कार्यकाल सकिएको छ । उनको ४ वर्षे कार्यकाल यहि जेठ महिनाको पहिलो सातादेखि सकिएको हो ।
न्यौपाने २०७४ साल जेठ ४ गते नेप्सेको अध्यक्षमा नियुक्त भएका थिए । उनलाई २०७४ जेठ ४ गतेको मन्त्रिपरिषद्को बैठकले नेप्सेको अध्यक्षमा नियुक्त गरेको थियो । उनले २०७४ जेठ ७ गते आइतबारदेखि कार्यभार सम्हालेका थिए । उनको कार्यकाल सकिएसंगै अब सरकारले नयाँ अध्यक्ष नियुक्त गरेर पठाउने छ ।
कम्पनी सचिव फेरिए
त्यस्तै नेप्सेको कम्पनीको सचिव पनि फेरिएका छन् । नेप्सेले कायम मुकायम सहायक प्रबन्धक मुराहरि पराजुलीलाई कम्पनी सचिवको जिम्मेवारी दिएको हो । यस अघि नेप्सेको कम्पनी सचिवमा उपप्रबन्धक प्रविन पन्दाक रहेकी थिईन् ।
सीइओको कार्यकाल पनि सकिंदै
नेप्सेको प्रमुख कार्यकारी अधिकृतको कार्यकाल पनि अब ४ महिना मात्र बाँकि रहेको छ । प्रमुख कार्यकारी अधिकृत चन्द्र सिंह साउदको कार्यकाल आगामी असोज २३ गते सकिने भएको हो । उनी ०७४ असोज २३ सोमबार नेप्सेको सीइओमा नियुक्त भएका थिए । शेर बहादुर देउवा नेतृत्त्वको सरकारले उनलाई ४ बर्षका लागि नियुक्त गरेको हो । त्यसपछि आएको सरकारले देउवा सरकारले गरेका सबै नियुक्त खारेज गरेसंगै त्यस बिरुद्द साउद सर्वोच्च अदालत गएका थिए । अदालतले उनलाई पुनर्बहाली गर्न आदेश दिएको थियो ।
