एनआईसी एशिया क्यापिटल NIC Asia Capital ले निष्काशन गरेको सामुहिक म्युचुअल फण्डको इकाई बाँडफांड भएको छ । क्यापिटलले असार १० गतेदेखि निष्काशन गरेको एनआईसी एशिया सेलेक्ट–३० (इन्डेक्स फण्ड)को इकाई आज आइतबार बाँडफांड भएको हो ।
यस निष्काशनमा ७१ हजार ३ सय ८८ आवेदकबाट १४ करोड ५४ लाख २३ हजार १ सय ७० कित्ताको लागि आवेदन परेको थियो । जस मध्ये १०० देखि ४५ लकः इकाई सम्म माग गर्ने लगानीकर्तालाई माग बमोजिम नै र ५० लाखदेखि १ करोड इकाई माग गर्ने लगानीकर्तालाई समान रुपमा ४९ लाख ३० हजार ६ सय ५ इकाई बाँडफांड गरिएको क्यापिटलले जनाएको छ । निष्काशनमा माग भन्दा बढीको आवेदन परेपछि यस योजनाको आकारलाई १ अर्ब बाट बढाएर १ अर्ब २५ करोडको कायम गरि सोहि अनुसार इकाई बाँडफांड गरिएको क्यापिटलले उल्लेख गरेको छ ।
प्रति इकाई मूल्य रु.१० दरको १० करोड इकाई मध्ये बीज पूँजी वापत न्यूनतम १ करोड ५० लाख इकाई कोष प्रबद्र्धक एन आई सी एशिया बैंकलाई सुरक्षित राखी बाँकी ८ करोड ५० लाख इकाई सर्वसाधारणको लागि सार्वजनिक निष्काशन गरिएको थियो ।
एन आई सी एशिया क्यापिटल योजना व्यवस्थापक रहेको यस सेलेक्ट –३० (इन्डेक्स फण्ड) सात वर्ष अवधि रहेको तेश्रो बन्दमुखी योजना हो । उक्त योजनामा संकलित अधिकाशं रकम धितोपत्रको दोश्रो बजारमा सूचिकृत कम्पनीहरुमा लगानी गरिने कम्पनीले जनाएको छ ।
क्यापिटलका प्रमुख कार्यकारी अधिकृत रमेन्द्र रायमाझीका अनुसार यस योजनाले सूचिकृत कम्पनीहरुमा लगानी गर्दा सूचिकृत कम्पनीहरुबाट राम्रा मानिएका कम्पनीहरु मध्ये ३० वटा कम्पनीहरु छनौट गरी लगानी गर्ने छ । लगानी गरिने कम्पनीहरुको छनौट गर्दा विभिन्न आन्तरिक प्यारामिटर अनुसार गरिने छ ।
विशेषत सूचिकृत कम्पनीहरुमा लगानी गर्दा ३० वटा कम्पनीहरुमा लगानी गरिने भएता पनि लगानीको अवसर र चुनौती हेरी लगानी गर्ने कम्पनीहरुको संख्यमा थपघट हुने र निश्चित समय पछि उक्त कम्पनीहरुको संख्यालाई पुनः मुल्याङ्गकन गरी ३० भन्दा बढी नहुने गरि कायम गरिने क्यापिटलले जनाएको छ ।
हाल एन आई सी एशिया क्यापिटलले दुई वटा बन्दमुखी योजना तथा एउटा खुलामुखी योजना संचालन गरिहेको छ । साथै क्यापिटलले एन आई सी एशिया बैंक म्युचुअल फण्ड अन्तर्गतको पाँचौं योजना एन आई सी एशिया फ्लेक्सी क्याप फण्ड नामक योजना स्वीकृतीको लागि नेपाल धितोपत्र बोर्डमा दर्ता गराईसकेको छ ।
