.gif)
नेपाल धितोपत्र बोर्डले अर्थ मन्त्रालयले सोधेको स्पष्टिकरण पेश गरेको छ । बोर्डले आज आइतबार मन्त्रालयमा स्पष्टिकरण पेश गरेको हो ।
बोर्ड अध्यक्ष भीष्मराज ढुंगानाले कार्यकारी निर्देशक, र उपकार्यकारी निर्देशकहरुलाई हस्ताक्षर गर्न लगाएर स्पष्टिकरण मन्त्रालयमा पठाएको स्रोतले जनाएको छ । स्रोतका अनुसार ढुंगानाले ४ पन्ने स्पष्टिकरण पत्र पठाएका छन् । जसमा ५ वटा विषय उल्लेख छ ।
स्पष्टिकरणमा बोर्ड अध्यक्ष ढुंगानाले मुख्यत: निम्न आशयको जवाफ पठाएको स्रोतले जनाएको छ ।
१. सर्वोत्तम सिमेन्ट नेप्सेमा सुचिकृत नभएकोले यस कम्पनी बोर्डको नियमनको क्षेत्राधिकार भित्रै पर्दैन । यस्ता कम्पनीको कारोबार ओटिसी बजारमा हुने गर्छ । ओटिसी बजारको आफ्नो छुट्टै नियमावली रहेको छ , त्यहाँ हुने कारोबार वा सुचनाको पहुँच बोर्डलाई वा बोर्डका संचालक समिति सदस्यलाई हुदैन ।
२. बोर्डले बोर्ड सदस्यको लागि बनाएको आचारसंहिताले बोर्डले अनुमति दिएको कम्पनीको शेयर मात्र खरिद गर्न नपाइने भनेको छ, सर्वोत्तम सिमेन्टलाई बोर्डले अनुमति नदिएकोले आचारसंहितामा रहेका प्रावधान आकर्षित हुदैन ।
३.सर्वोत्तम सिमेन्टले आईपिओ निष्काशनको लागि बोर्डमा आवेदन दिएको छैन , बोर्डले अन्य कुनै काम गर्नको लागि कुनै पनि अनुमति पनि दिएको छैन, यो कम्पनी बोर्डको नियमन भित्र नै पर्दैन ।
४. बोर्डको कर्मचारी सेवा शर्त नियमावली अनुसार एकाघरका परिवारको परिभाषा भित्र विवाहित छोरी पर्दैन ।
५, मिडियामा आएका सबै समाचार तथ्यहीन र भ्रमपूर्ण रहेको छ । कतिपय समाचारले अफवाह फैलाएका छन् ।
अर्थ मन्त्रालयको वित्तीय क्षेत्र ब्यबस्थापन तथा संस्थान समन्वय महाशाखाले बुधबार स्पष्टिकरण पेश गर्ने पत्र बोर्डमा पठाएको थियो । पत्रमा भनिएको थियो 'विभिन्न संचार माध्यममा प्रकाशित तहाँ बोर्डसंग सम्बन्धित समाचारप्रति यस मन्त्रालयको ध्यानाकर्षण भएको छ । संचार माध्यममा आएका उक्त विषयवस्तुको समबन्धमा सत्य तथ्य यथार्थता के हो, सोको स्पष्ट र तथ्यपरक विवरण ३ (तीन) भित्र यस मन्त्रालयमा उपलब्ध गराईदिनि हुन आदेशानुसार अनुरोध छ' ।
बोर्ड अध्यक्ष भिष्मराज ढुंगानाले आफ्नो छोरीको नाममा र बोर्डका संचालक समितिका सदस्य रहेका चन्द्र ढकालले आफ्नो भाईको नाममा सर्वोत्तम सिमेन्टको शेयर खरिद गरेको समाचार संचारमाध्यममा आएपछि मन्त्रालयले स्पष्टिकरण सोधेको हो । यस कम्पनीले बुक विल्डिग विधिबाट आईपिओ निष्काशन गर्ने तयारी गरेको छ ।
