नेपाल स्टक एक्सचेन्ज नेप्सेमा युनियन लाइफ इन्स्योरेन्सको शेयर कारोबार सुचारु भएको छ । हिजो आइतबार नेप्सेमा शेयर सुचिकृत भएसंगै कम्पनीको आज सोमबारबाट कारोबार सुरु भएको हो ।
युनियन लाइफको पहिलो कारोबार ३४२ रुपैयाँमा भएको छ ।स्पेसल प्रि ओपन सेसनमा कम्पनीको ३४२ रुपैयाँमा पहिलो कारोबार भएको हो । नेप्सेले कम्पनीको पहिलो कारोबारको लागि ११५ रुपैयाँ १३ पैसा देखि ३४५ रुपैयाँ ३९ पैसा सम्मको रेन्ज तोकेको छ । यो रेन्जको जुनसुकै मूल्यबाट कम्पनीको शेयर कारोबार सुचारु हुन सक्ने ब्यबस्था छ । नेप्सेले पहिलो कारोबारको लागि कम्पनीको नेटवर्थको ३ गुणासम्मको मूल्य तोक्ने गरेको छ । कम्पनीको ULI सिम्बलबाट कारोबार भएको हो ।
मनकामना स्मार्ट लघुवित्तको भने आज कारोबार भएँन ।स्पेसल प्रि ओपन सेसनको कारोबारमा कम्पनीको कुनै पनि अर्डर म्याच नभएपछि कम्पनीको कारोबार हुन नसकेको हो । यस संगै अब आज कम्पनीको नियमित समयमा कारोबार हुने छैन । भोलि मंगलबारको प्रि ओपन सेसनमा कारोबार भई सुरुवाती मूल्य तय भएपछि मात्र कम्पनीको नियमित कारोबार सुरु हुने छ । नेप्सेले कम्पनीको पहिलो कारोबारको लागि ११० रुपैयाँ ८४ पैसा देखि ३०२ रुपैयाँ ५२ पैसा सम्मको रेन्ज तोकेको थियो । यो रेन्जको जुनसुकै मूल्यबाट कम्पनीको शेयर कारोबार सुचारु हुन सक्ने ब्यबस्था छ । नेप्सेले पहिलो कारोबारको लागि कम्पनीको नेटवर्थको ३ गुणासम्मको मूल्य तोक्ने गरेको छ । कम्पनीको MKLB सिम्बलबाट कारोबार हुने छ ।
मनकामनाको आइतबार १२ लाख ११ हजार ५ सय कित्ता शेयर सुचिकृत भएको हो । कम्पनीले असार १७ गतेदेखि आईपिओ बिक्रि खुला गरेको थियो । कम्पनीले ३ करोड ८९ लाख बराबरको ३ लाख ८९ हजार कित्ता शेयर निष्काशन गरेको हो । जस मध्ये ६ हजार ५८ कित्ता कम्पनीका कर्मचारीलाई र १९ हजार ४ सय ५० कित्ता शेयर सामुहिक लगानी कोषलाई छुट्याईएको थियो । बाँकि रहेको ३ लाख ६३ हजार ४ सय ९२ कित्ताको लागि सर्वसाधारणले आवेदन दिएका थिए।
कम्पनीको आईपिओमा कुल १९ लाख ५४ हजार २ सय ७४ जनाबाट २ करोड ५१ लाख ३३ हजार २ सय ९० कित्ताको लागि आवेदन परेको थियो । जस मध्ये २ हजार ७ सय ५३ जनाको आवेदन रद्द भएको र १९ लाख ५१ हजार ५ सय २१ जना योग्य आवेदक कायम भएका थिए।
माग भन्दा बढीको आवेदकले आवेदन दिएकोले गोलाप्रथाबाट ३६ हजार ३ सय ४९ जनाले १० कित्ताको दरले शेयर पाएका थिए । ति मध्ये २ जनाले ११ कित्ता शेयर पाएका थिए । यस हिसाबमा आवेदन दिएका मध्ये १९ लाख १७ हजार बढी आवेदन हात खाली भएका थिए।
त्यस्तै युनियनले असार २४ गतेदेखि असार २८ गतेसम्म आईपिओ बिक्रि खुला गरेको थियो । कम्पनीले सर्वसाधारणको लागि ६४ करोड २० लाखको बराबरले हुन आउने ६४ लाख ५० हजार कित्ता शेयर निष्काशन गरेको थियो । जस मध्ये ३ लाख २२ हजार ५ सय कित्ता कर्मचारीको लागि र ३ लाख २२ हजार ५ सय कित्ता सामुहिक लगानी कोषलाई सुरक्षित गरिएको थियो । बाँकि रहेको ५८ लाख ५ हजार कित्ताको लागि सर्वसाधारणले आवेदन दिएका हुन्।