सनराइज बैंक Sunrise Bank Limited ले आफ्नो स्वामित्वमा रहेको लुम्बिनी जनरल इन्स्योरेन्सको १ लाख कित्ता बढी शेयर लिलाम गर्ने भएको छ । बैंकले आफ्नो स्वामित्वमा रहेको लुम्बिनी जनरल इन्स्योरेन्सको १ लाख २२ हजार २ सय ८७ कित्ता शेयर आज भदौ ११ गतेदेखि लिलाममा ल्याएको हो ।
बैंकले यी शेयरको न्युनतम मूल्य ४२१ रुपैयाँ ६३ पैसा कायम गरेको छ । सो भन्दा बढी रकम कबुल गरेर आवेदन दिनु पर्ने छ । सबै भन्दा बढी रकम कबुल गर्नेले शेयर पाउने छन् । सबैभन्दा बढी रकम कबुल गर्नेले शेयर पाएपछि पनि शेयर बाँकि रहेको खण्डमा दोस्रो बढी मूल्य कबुल गर्नेले शेयर पाउने छन् । शेयर नसकिंदासम्म यहि प्रक्रियाबाट शेयर बाँडफाँड हुने छ ।
यस लिलामीको शेयरमा हालका संस्थापक शेयरधनी वा जो कोहि योग्य व्यक्ति वा संस्थाले आवेदन दिन सक्ने छन् । आवेदन दिंदा न्युनतम १ हजार कित्ता र अधिकतम पुरै कित्ताको लागि आवेदन दिन सकिने छ । असोज १ गतेसम्म आवेदन दिई सक्न बिक्रि प्रबन्धक सनराइज क्यापिटलले आग्रह गरेको छ ।
आवेदन दिनको लागि कालोसूचीमा नरहेको पत्र, कर चुक्ता प्रमाणपत्र, आयको स्रोत विवरण, स्व घोषणा विवरण, र नियामक निकायले तोकेबमोजिमको फिट एण्ड प्रपर टेस्टको फारम पनि पेश गर्नु पर्ने छ। आवेदक व्यक्ति भएमा एक प्रति फोटो, र नागरिकताको प्रतिलिपि पनि आवश्यक पर्ने छ । आवेदन संस्था भएमा संस्थाको प्रबन्धकपत्र , नियमावली, वित्तीय विवरण, कर चुक्ता विवरण, संचालक समितिले शेयर खरिद गर्ने निर्णय गरेको माईन्युट पनि पेश गर्नु पर्ने छ । हाल कायम शेयरधनीले भने आफ्नो शेयरधनी नम्बर पनि उल्लेख गर्नु पर्ने छ ।