धितोपत्र बोर्डले ५१ वटा कम्पनीको सूची जारी गरेपछि बोर्ड विरुद्द दायर गरिएको मुद्दामा आज दोस्रो पटक पेशी तोकिएको छ। अधिवक्ता रविन बोहजु र अधिवक्ता सुरेन्द्र कोंजुले बोर्ड बिरुद्द सर्वोच्च अदालतमा असार ४ गते रिट दायर गरेका थिए ।
उक्त रिटमा असार ६ गते डा. कुमार चुडालको एकल इजलाशले कारण देखाउ आदेश जारी गर्दै अनतरिम आदेश नहुने उल्लेख गरेको थियो । ६ महिनापछि सोहि मुद्दाको पेशी आज तोकिएको छ । आज न्यायधीश इश्वर खतिवडा र टंकबहादुर मोक्तानको संयुक्त इजलाशमा उक्त पेशी तोकिएको छ । यो पेशी इजलाशको २४ औ नम्बरमा रहेकोले यसमा सुनुवाई हुने सम्भावना भने न्यून छ ।
रिटमा बोर्डले सार्वजनिक गरेको ५१ वटा कम्पनीको सुचीसहितको विज्ञप्ति बदर गर्न माग गरिएको छ । रिट निवेदन अधिवक्ता बोहजुले बोर्डले ५१ वटा कम्पनी जोखिमयुक्त भनी जारी गरेको विज्ञप्ति कानुन सम्मत नभएकोले उक्त विज्ञप्तिलाई बदर गर्न माग गरिएको बिजपाटीलाई जानकारी दिए ।
बोर्डको उक्त कदम ऐनमा उल्लेख बोर्डको काम कर्तब्य अधिकारभन्दा बाहिर रहेको र यसले लगानीकर्तालाई त्रसित र आतंकित बनाएकोले विज्ञप्ति बदर हुनु पर्ने माग गरिएको अधिवक्ता बोहजुले बताए । रिट निवेदनमा शेयर कर्नरिङ रोक्नको लागि छुट्टै कानुन बनाउनको लागि बोर्डलाई परमादेश दिनको लागि पनि माग गरिएको छ ।
