साताको पहिलो दिन आज आइतबार शेयर बजार परिसूचक नेप्सेमा भारी गिरावट आएको छ । आज नेप्से सूचक १०१.२४ अंकले घटेर २७००.३२ को बिन्दुमा पुगेर रोकिएको छ ।
आज कारोबारमा आएका २२७ कम्पनीका १ करोड १६ लाख ६१ हजार ६ सय ३९ कित्ता शेयर खरीद बिक्रिबाट ५ अर्ब ९७ करोड ७२ लाख १४ हजार ७ सय ३१ रुपैयाँको कारोबार भएको छ । आज अपर तामाकोशीको सबैभन्दा धेरै ३२ करोड ८४ लाख, अरुण भ्याली हाइड्रोको २८ करोड ३९ लाख, निफ्राको २५ करोड ३२ लाख, नेशनल हाइड्रोको २५ करोड २७ लाख, तथा अपि पावरको २१ करोड ४७ लाख बराबरको कारोबार भएको छ ।
आज कारोबारमा आएका सबै समुहगत सूचक घटेका छन् । जस मध्ये हाइड्रोपावर समुह सबैभन्दा धेरै ५.४७ प्रतिशतले घटेको छ भने इन्भेष्टमेन्ट समुह ५.०३ प्रतिशतले घटेको छ । त्यस्तै विकास बैंक समुह ४.२३ प्रतिशतले, फाइनान्स समुह ४.६५ प्रतिशतले , निर्जीवन बीमा समुह ४.२७ प्रतिशत, र उत्पादन तथा प्रशोधन समुह ४.६१ प्रतिशतले घटेको छ ।
आजको कारोबारमा ५ वटा म्युचल फण्ड समुहको मात्र इकाई मूल्य बढेको छ । आजको कारोबार अपर तामाकोशीको शेयर मूल्य सबैभन्दा धेरै ८.३७ प्रतिशतले घटेको छ भने नारायणी डेभलपमेन्ट बैंकको शेयर मूल्य ८.२६ प्रतिशतले घटेको छ ।
बैंक तथा वित्तीय संस्थाहरुले फागुन महिनाको लागि ब्याजदर बढाएकोले लगानीकर्ता प्यानिक भई त्यसको प्रभाव बजारमा परेको विश्लेषक बताउछन् । त्यसका साथै सत्तारुढ दलले प्रधानन्यायधीशलाई महाभियोग लगाएको र त्यसले राजनीतिक अन्योलता बढ्न सक्ने भएकोले पनि त्यसको मनोवैज्ञानिक असर लगानीकर्तामा परेको बताईन्छ । तर प्रधानन्यायधीशलाई महाभियोग लगाएको समाचार बाहिर आउनु अगाडी नै नेप्से करिब ८० अंकले घटिसकेकोले ब्याजदर बढ्नु नै बजार घट्नुको प्रमुख कारण रहेको विश्लेषकको भनाई छ ।
