नेपाल धितोपत्र बोर्डका नवनियुक्त अध्यक्ष रमेश हमालले पदभार ग्रहण गरेका छन्। उनले आज बिहान ११ बजे खुमलटार स्थित बोर्डको कार्यलय पुगेर पदभार ग्रहण गरेका हुन् ।
उनलाई बोर्डका कार्यकारी निर्देशक निरज गिरि, उपकार्यकारी निर्देशकहरु, तथा उच्च तहका कर्मचारीहरुले स्वागत गरेका थिए । अध्यक्ष हमालले बोर्डको लागि प्रयोग गरिने एकाउन्टिङ सफ्टवेयर र प्रशासनिक कार्यको लागि प्रयोग गरिने सफ्टवेयरबारे अध्ययन गरि बोर्डलाई सिफारिस गर्नेको लागि कमिटि गठन गर्ने निर्णयमा हस्ताक्षर गरेका छन् ।
पदभार ग्रहण गर्दै उनले पुँजीबजारबारे चिन्तित भएरै आफु बोर्डमा आईपुगेको बताएका छन्। आइतबार बोर्डमा पदबहाली गर्ने क्रममा उनले लगानीकर्ता, बोर्डका कर्मचारी र सरकारलाई पनि बजारको बारे चिन्ता भएको बताएका हुन् ।
उनले साना लगानीकर्तालाई मर्का पर्न नहुने बताए । उनले भने 'साना लगानीकर्तालाई नबचाउने बजारको कहिल्यै पनि दिगो विकास हुन सक्दैन, मेरो अहिलेको उदेश्य भनेको साना लगानीकर्तालाई कसरि बचाउने, र उनीहरुको लगानी जोखिममा नपरोस् भन्ने हो'।
बजारलाई कसरी स्वस्थ बनाउने र कसरि पारदर्शी बनाउने भन्नेमा आफुले काम गर्ने बताए ।त्यस्तै उनले नियमनकारी निकाय नियामक नै हुनु पर्ने र कसैलाई अन्याय नहुने गरि काम गर्ने बताए।
