हाइड्रोइलेक्ट्रोसिटि इन्भेष्टमेन्ट एण्ड डेभलपमेन्ट कम्पनी लिमिटेड (एचआईडिसीएल) लाई हकप्रदमा बिक्रि नभएको संस्थापक शेयर बेच्न हम्मे हम्मे परेको छ । प्रति कित्ता १०० रुपैयाँमा पनि शेयर खरिद गर्ने आवेदक नभेटिएपछि कम्पनीलाई शेयर बिक्रि गर्न हम्मेहम्मे परेको हो ।
कम्पनीले पछिल्लो पटक साउन १५ गतेदेखि साउन २९ गतेसम्म २ करोड ७८ लाख ९ हजार ४ सय ८० कित्ता संस्थापक शेयर लिलाममा ल्याएको थियो । तर उक्त लिलामीको शेयरमा केवल ४६ लाख ४ हजार ९ सय ८५ कित्ता शेयरको लागि आवेदन परेको छ । उक्त लिलामीको कट अफ मूल्य १०० रुपैयाँ नै कायम भएको छ । अर्थात् १०० रुपैयाँमा आवेदन दिने सबैले शेयर पाएका छन्। लिलामीको शेयरमा न्युनतम १०० रुपैयाँ कबुल गर्नु पर्ने ब्यबस्था रहेकोमा १०० रुपैयाँ र सो भन्दा माथि कबुल गर्ने सबैले शेयर पाएका छन् ।
कम्पनीले बाँकि रहेको शेयर फेरी लिलाममा ल्याउने छ । कम्पनीले २ करोड ३२ लाख ४ हजार ४ सय ९५ कित्ता संस्थापक शेयर फेरी लिलाममा ल्याउने छ । यस शेयरमा जो कोहि लगानीकर्ताले आवेदन दिन पाउने भएपनि यो कम्पनीको संस्थापक् शेयर हो । कम्पनीको संस्थापक शेयर HIDCLP सिम्बलबाट र साधारण शेयर HIDCL सिम्बलबाट कारोबार हुने छ । कम्पनीले संस्थापक शेयरधनीहरुको शेयर नयाँ संकेत अनुसार संस्थापक शेयरधनीको खातामा जम्मा भईसकेको जनाएको छ ।
कम्पनीका अनुसार बोलकबोल प्रकृयाद्वारा बिक्री गरिएको शेयर खरिद गर्ने शेयरधनीहरु समूह “क” को उप-समूह “क-२” अन्तर्गतको “अन्य संस्थापक” उप-समूहमा रहनेछन्। उक्त शेयर बाँडफाँट भई नेपाल स्टक एक्सचेञ्जमा सूचीकरण भएपश्चात् “HIDCLP" सङ्केतमा कारोबार गर्न योग्य हुने छ र प्रबन्धपत्रको दफा ६ को खण्ड (छ) मा भएको व्यवस्था अनुसार नेपाल स्टक एक्सचेञ्ज मार्फत सो शेयर खरिद गर्ने शेयरधनीहरु समेत समूह “क” को उप-समूह “क-२” अन्तर्गतको “अन्य संस्थापक” उप-समूहमा नै रहनेछन्।