नेपाल धितोपत्र बोर्डले १६ जना कर्मचारीको बढुवाको लागि सूचना प्रकाशन गरेको छ । बोर्डले कार्यक्षमता मुल्यांकनको आधारमा बढुवा गर्नको लागि दरखास्त आह्वान गरेको हो ।
बोर्डले कार्यकारी निर्देशक पदमा २ जना, उप कार्यकारी निर्देशक पदमा २ जना, प्रशासन समुहको निर्देशकमा ६ जना, कानुन समुहको निर्देशकमा १ जना, लेखा समुहको निर्देशकमा १ जना, सूचना प्रविधि समुहको निर्देशकमा १ जना, प्रशासन समुहको सहायक निर्देशकमा २ जना, र प्रशासन समुहको बरिष्ठ सहयक पदमा १ जनाको बढुवा गर्न लागेको हो । बोर्डले लोक सेवाको सहमतिमा कर्मचारीको बढुवा गर्न लागेको हो । बोर्डले सूचना प्रकाशन भएको मितिले ३० दिन भित्र योग्य तथा इच्छुक आवेदकलाई आवेदन दिन आग्रह गरेको छ।
बोर्डमा कार्यकारी निर्देशक विभागीय प्रमुखको रुपमा रहने गरेका छन् । त्यस्तै उप कार्यकारी निर्देशकहरु महाशाखा प्रमुखको रुपमा हुन्छन्। हाल कार्यकारी निर्देशकमा ३ जनाको र उपकार्यकारी निर्देशकमा ८ जनाको दरबन्दी छ। त्यस्तै बोर्डका निर्देशकहरु शाखा प्रमुखको रुपमा रहने ब्यबस्था छ । बोर्डमा कर्मचारीको बढुवा नहुँदा अधिकांश कर्मचारीले कामुको भरमा काम गरिरहेका छन् ।
हाल बोर्डमा डा. नवराज अधिकारी र विनय देव आचार्य कार्यकारी निर्देशक छन् । मुक्तिनाथ श्रेष्ठ र कृष्णराज पोखरेल कामु कार्यकारी निर्देशकको रुपमा कार्यरत छन् ।