२०७९ सालको अन्तिम महिना चैतमा घरजग्गा कारोबार बढेको छ । वर्षको सुरुवादेखि नै घरजग्गा कारोबारमा मन्दी आएको भएपनि चैतमा देशभर ४९ हजार १५० घरजग्गा किनबेच भएका छन् । यो तथ्यांक भनेको पछिल्लो १० महिना यता कै बढी हो ।
भूमि व्यवस्थापन तथा अभिलेख विभागका अनुसार फागुनमा देशभरका मालपोत कार्यालयबाट ४० हजार ७३९ घरजग्गा कारोबार भएकोमा चैतमा ४९ हजार नाघेको हो ।
कित्ताकाट खुल्न थालेसँगै घरजग्गा किनबेच पनि बढ्न थालेको विभागका प्रवक्ता कृष्णप्रसाद भण्डारीको भनाइ छ । ७५३ स्थानीय तहमध्ये हालसम्म १६० स्थानीय तहले मात्रै जग्गाको वर्गीकरण सकेका छन् । वर्गीकरण भएका स्थानीय तहमा कित्ताकाट खुला भएको छ ।
बैंकमा तरलता सहज हुन थालेको र ब्याजदर पनि घट्न थालेपछि घरजग्गा कारोबारमा उछाल आउन सुरु भएको हो ।
प्रधानमन्त्री पुष्पकमल दाहालले पुरानै स्थितीमा कित्ताकाट खुलाउने बताएपछि पनि कारोबार बढ्न सुरु गरेको हो । तर, सबैतिर कित्ताकाट खुला भए घरजग्गा कारोबार पुरानै लयमा फर्किने पक्का देखिएको कारोबारीहरु बताउँछन् ।
चैत महिनामा सबैभन्दा धेरै घरजग्गा किनबेच हुनेमा धनुषाको जनकपुरधाम मालपोत कार्यालय पहिलो नम्बरमा छ । चैतमा जनकपुरबाट १९२१ घरजग्गाको लिखत पारित भएको छ ।
दोस्रो नम्बरमा मोरङको बेलवारी मालपोत छ । यहाँबाट १७६४ लिखत पारित भएको छ । बाँकेको नेपालगञ्जमा १७५८, सुनसरीको इनरुवामा १७२३, झापाको भद्रपुरमा १३३७ घरजग्गा कारोबार भएका छन् ।
काभ्रेमा १२५८, चितवनको भरतपुरमा १२५६, झापाको दमकमा १२४९, सप्तरीको राजविराजमा १२१०, मोरङको विराटनगरमा १२०६ घरजग्गा किनबेच भएका छन् ।
काठमाडौँ उपत्यकामा भक्तपुरमा बढी ११८९ घरजग्गा किनबेच भएका छन् । यसपछि ललितपुरमा ११४४ लिखत पारित भएको छ ।
तौलिहवामा ११५७, पर्सामा १०३३, बाराको कलैयामा १११९, रुपन्देहीको बुटवलमा १०१९, कैलालीको धनगढीमा १०१८, महोत्तरीको जलेश्वरमा १०१२, दाङको तुलसीपुरमा १ हजार घरजग्गाको लिखत पारित भएको छ ।
चैतमा भएका घरजग्गा कारोबारबाट ४ अर्ब ५१ करोड रुपैयाँ राजस्व संकलन भएको छ ।