विदेशबाट नेपाल भित्रिने रेमिट्यान्स २७.५ प्रतिशतले बढेको छ । चालु आर्थिक बर्ष २०७६/७७ को चैत महिनाको तुलनामा वैशाख महिनामा २७.५ प्रतिशतले बढी रेमिट्यान्स भित्रिएको नेपाल राष्ट्र बैंकको तथ्यांकले देखाएको छ ।
राष्ट्र बैंकका अनुसार चालु आर्थिक बर्षको वैशाख महिनामा ४४ अर्ब रुपैयाँ रेमिट्यान्स नेपाल भित्रिएको छ, जुन रकम चालु आर्थिक बर्षको चैत महिनामा भित्रिएको भन्दा २७.५ प्रतिशतले बढी हो । चालु आर्थिक बर्षको चैत महिनामा ३४ अर्ब ५० करोड रुपैयाँ रेमिट्यान्स नेपाल भित्रिएको थियो ।
त्यस्तै गत आर्थिक बर्षको वैशाख महिनाको तुलनामा चालु आर्थिक बर्षको वैशाखमा नेपाल भित्रिने रेमिट्यान्स २८ अर्ब ११ करोड रुपैयाँले घटेको छ । गत आर्थिक बर्षको वैशाखमा ७२ अर्ब ११ करोड रुपैयाँ भित्रिएको थियो भने चालु आर्थिक बर्षको वैशाखमा जम्मा ४४ अर्ब रुपैया रेमिट्यान्स नेपाल भित्रिएको राष्ट्र बैंकले जनाएको छ।
