चालु अर्थिक बर्षको २०७६।०७७ दश महिनामा विप्रेषण आप्रवाह ६.१ प्रतिशतले घटेको छ । चालु आर्थिक वर्षको वैशाख महिनासम्ममा कुल विप्रेषण छ खर्ब ८० अर्ब ८४ करोड रुपैयाँ भित्रिएको छ जुन गत आर्थिक वर्षको सोही अवधिमा भित्रिएको रकमभन्दा ६.१ प्रतिशत कम हो ।
नेपाल राष्ट्र बैंकको तथ्यांक अनुसार गत आर्थिक बर्ष २०७५।०७६ को दश महिनासम्ममाा विप्रेषण आप्रवाह १९.६ प्रतिशतले बढेको थियो । त्यस्तै गत अर्थिक वर्षको तुलनामा चालु अर्थिक बर्षको दशमहिनासम्ममा अमेरिकी डलरमा विप्रेषण आप्रवाह ७.४ प्रतिशतले घटेको छ । अघिल्लो वर्ष यस्तो आप्रवाह ९.३ प्रतिशतले बढेको राष्ट्र बैंकले जनाएको छ ।
यस्तै चालु आर्थिक बर्षको दशमहिनासम्मामाा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या २.७ प्रतिशतले घटेको छ । अघिल्लो वर्षको सोही अवधिमा यस्तो संख्या ३६.८ प्रतिशतले घटेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा २४.६ प्रतिशतले घटेको छ । अघिल्लो वर्षको सोही अवधिमा यस्तो संख्या ५.८ प्रतिशतले बढेको थियो।