स्प्रेड रेटका कारण बैंकको मुनाफा घट्ने बताईरहँदा प्राइम कमर्सियल बैंक Prime Commercial Bank Limited को मुनाफा भने बढेको छ। चालु आर्थिक वर्षको दोस्रो त्रैमासमा बैंकले १ अर्ब ३० करोड ७ लाख ८७ हजार खुद मुनाफा आर्जन गरेको हो । गत आर्थिक वर्षको दोस्रो त्रैमासमा १ अर्ब ६ करोड ८ लाख ९७ हजार मुनाफा आर्जन गरेको बैंकको मुनाफा चालु आर्थिक वर्षको सोहि अवधिमा २२.६१ प्रतिशतले बढेको छ । यस अवधिमा बैंकको वितरणयोग्य मुनाफा ८६ करोड ५९ लाख ५९ हजार रहेको छ ।
बैंकको मुख्य आम्दानीको स्रोत मानिने खुद ब्याज आम्दानीमा वृद्धि हुँदा बैंकको मुनाफा पनि बढेकोे हो । गत आर्थिक वर्षका सोहि अवधिको तुलनामा समिक्षा अवधिमा बैंकको खुद ब्याज आम्दानी २२.०३ प्रतिशतले बढेको छ । गत आर्थिक वर्षको दोस्रो त्रैमासमा १ अर्ब ७७ करोड २२ लाख ३ हजार खुद ब्याज आम्दानी गरेको बैंकले चालु आर्थिक वर्षको सोहि अवधिमा २ अर्ब १६ करोड ४६ लाख १० हजार खुद ब्याज आम्दानी गरेको छ ।
खुद ब्याज आम्दानीमा वृद्धि हुँदा बैंकको कुल संचालन आम्दानी र संचालन मुनाफा पनि बढेको छ । गत वर्षको दोस्रो त्रैमासमा १ अर्ब ५१ करोड ४५ लाख संचालन मुनाफा आर्जन गरेको बैकले चालु आर्थिक वर्षको सोहि अवधिमा १ अर्ब ८५ करोड ३८ लाख संचालन मुनाफा आर्जन गरेको छ । पुष मसान्त सम्ममा ९ अर्ब ६८ करोड ६८ लाख ५१ हजार चुक्ता पुँजी रहेको बैंकले जगेडा कोषमा ३ अर्ब १९ करोड ६७ लाख ३१ हजार राखेको छ । यस्तै बैंकको संचित कोषमा २ अर्ब ४६ करोड ११ लाख १७ हजार छ भने शेयर प्रिमियममा ६ लाख ४४ हजार रहेको छ ।
गत आर्थिक वर्षको पुष मसान्तमा ७७ अर्ब ४ करोड निक्षेप संकलन गरेको बैंकको चालु आर्थिक वर्षको समिक्षा अवधिमा ८० अर्ब ३५ करोड ३५ लाख पुगेको छ । चालु आर्थिक वर्षको पुष मसान्त सम्ममा बैंकको कर्जा लगानी ८० अर्ब ९१ करोड ५४ लाख रहेको छ । गत आर्थिक वर्षको सोहि अवधिमा ७२ अर्ब ५४ करोड ५४ लाख कर्जा लगानी गरेको थियो ।
बैंकको खराब कर्जा गत वर्षको दोस्रो त्रैमासमा १.५८ प्रतिशत रहेकोमा चालु आर्थिक वर्षमा सामान्य सुधार भएर १.४५ प्रतिशतमा झरेको छ । त्यस्तै बैंकको सिसिडि रेसियो ७६.५४ प्रतिशत रहेको छ । पुँजीकोष अनुपात १३.२३ प्रतिशत रहेको बैंकको कोषको लागत ७.६५ प्रतिशत, ब्याजदर अन्तर (स्प्रेड रेट) ५.११ प्रतिशत र आधार ब्याजदर ९.४५ प्रतिशत रहेको छ । यस्तै प्रतिशेयर आम्दानी २६ रुपैयाँ ८६ पैसा, प्रतिशेयर नेटवर्थ १ सय ५८ रुपैयाँ ४१ पैसा र मुल्य आम्दानी अनुपात ९.६८ गुणा रहेको छ ।
