अर्थमन्त्री डा युवराज खतिवडाले नेपालमा लगानी गर्न चाहने विदेशी लगानीकर्तालाई नेपालले २ वटा 'पावर' दिने बताएका छन् । राजधानीमा बुधबारदेखि सुरु भएको पूर्वाधार सम्मेलनमा मन्त्री खतिवडाले यस अघि नेपालले दिन नसकेको २ पक्रारका पावर अब नेपालले दिन सक्ने बताएका हुन् ।
उनले अब नेपालले ;पोलिटिकल पावर' अर्थात् स्थिर सरकार र 'इलेक्ट्रिक पावर' अर्थात् २४ सै घण्टा बिजुली दिने बताएका हुन् । यस अघि यी सेवा नभएकोले अब ढुक्क भएर नेपालमा लगानी गर्न आग्रह गरेका हुन् ।
उनले नेपालमा आएका सबै वैदेशिक लगानीकर्ताले अन्य विश्वबजारको तुलनामा दोब्बर बढी प्रतिफल लैजाने गरेको बताए । उनले भने 'नेपालमा आएका बिदेशी लगानीकर्ताले २५ प्रतिशतभन्दा बढी प्रतिफल लागेका छन्, विश्वब्यापी औसत दर १० प्रतिशत भन्दा पनि कम छ' ।
उनले नेपालमा सरकारको दायित्व अन्य देश भन्दा बढी भएकोले पूर्वाधार विकासमा धेरै खर्च गर्न नसकेको बताए । नागरिकलाई ३० भन्दा बढी मौलिक हक दिएको, सघियता मार्फत ७६१ सरकार गठन गरेको, सामाजिक सुरक्षा लागु गरेको, दिगी विकास लक्ष्य हासिल गर्नु पर्ने भएको र यी सबको लागि ठुलो खर्च हुने भएकोले सरकारले पूर्वाधारमा पर्याप्त लगानी गर्न नसकको बताए ।
उनले हरेक क्षेत्रमा निजि लगानी खुला गर्ने सकिने समेत बताए । हाल सरकारले पनि जलविद्युत उत्पादन गर्दै आएको बताउदै केहि समयपछि बिद्युत निजि क्षेत्रले मात्र उत्पादन गर्नु पर्ने उनले बताए । निजि क्षेत्रले चाहेमा प्रसारण लाइन निर्माणमा पनि निजि लगानी खुला गर्न सकिने उनले बताए ।
तर निजि क्षेत्र आउँदा दुवैलाई फाइदा हुने गरी 'विन विन' को अवस्था हुनु पर्नेमा उनले जोड दिए । उनले भने 'सरकारले भन्दा निजि लगानीकर्ताले कमाओस तर सरकारलाई त्यस कै कारणले घाटामा जानु भएँन' । यद्यपी उनले लगानी गर्दा जोखिम पनि निजि क्षेत्र र सरकारले बाडेर लिने बताए ।