नौबिसे–नागढुंगा सडक खण्डमा धादिङतर्फ ३० किलोमिटरसम्म सवारी जाम हुन थालेको छ । दशैँको चाप सुरु हुन् लाग्दा सडक मर्मतको काम बल्ल सुरु गरेपछि सडकमा लामो जाम देखिन थालेको हो ।
गत असारमै सक्नुपर्ने यो काम बल्ल सुरु भएको हो । मर्मतको कार्य सुरु भएको , दशैँको समयमा गाडीको चहल पहल बढेको र मालसामान लिएर ठुला ट्रक राजधानी भित्रिने गरेकोले जाम बढेको हो । दशैंको मुखमा जाम हुँदा काठमाडौंको नागढुंगा छिचोलेर गल्छी पुग्न मात्रै सवारीले ८ घण्टा लाग्न थालेको छ । ब्यापक सवारी जाम हुँदा यात्रुले सास्ती पाउन थालेका छन् भने बाटोमा फसेका बिरामीको मृत्यु समेत हुन् थालेको छ ।
जनकपुरबाट काठमाण्डौका लागि छुटेको ना ७ ख ५३६४ नम्बरको बसमा रहेका रौतहट गरुणा नगरपालिका ८ का ३५ वर्षका रुपलाल शाहको जाममा परेका बेलामा बिहान ज्यान गएको प्रहरीले जनाएको छ । शाह क्यान्सर पीडित भएको परिवारले बताएका छन् ।
अहिले शाहको शव पोष्टमार्टमको लागि लैजाने तयारी छ ।
