बैंक र बैंकका एटिएम ह्याकका घटना बढेपछि प्रहरीले बैंकका प्रमुख कार्यकारी अधिकृत (सिइओ) हरुसँग छलफल गरेको छ । महानगरीय प्रहरी अपराध महाशाखाले ३१ ओटा बैंकका सिईओलाई बोलाएरै छलफल गरेको होे ।
महाशाखाका एसएसपी सहकुल थापाका अनुसार बैंक तथा वित्तीय क्षेत्रमा बढिरहेको अपराधका सम्बन्धमा बैंकको डिजिटल प्रणालीको सुधार र भौतिक सुरक्षाका विषयमा छलफल भएको हो । एसएसपी थापाले बैंकको समग्र प्रणाली र बैंकले विभिन्न स्थानमा सञ्चालनमा ल्याएका एटिएम बुथको सुरक्षामा ध्यान दिन आग्रह गरिएको छ ।
चाडपर्वको समयमा बैंकको सुरक्षा चूनौती संवेदनशील हुने भएकाले यसतर्फ सचेत रहन प्रहरीले बैंकहरुलाई सुझाव दिएको छ । महाशाखाले सुरक्षामा सतर्कता अपनाउन र कही कतै शंकास्पद गतिविधि भए तत्काल सूचना दिन पनि आग्रह गरेको छ ।
