आफ्नै सचिवालयकी महिला कर्मचारीमाथि बलात्कारको आरोप लागेका प्रतिनिधि सभाका सभामुख कृष्णबहादुर महराले आफूमाथि आरोप लगाउने महिलासँग बसेर रक्सी खाएको स्वीकार गरेका छन् । तर महराको सचिवालयले जारी गरेको विज्ञप्तिमा भने महरा बलात्कार भएको भनिएको दिन मरहा कतै ननिस्किएको दाबी गरेको थियो ।
सचिवालयले जारी गरेको विज्ञप्तिमा बलात्कार भएको भनिएको दिन आइतबार सभामुख महरा दिउँसो १२ बजे सिंहदरबारस्थित आफ्नो कार्यकक्षमा गएको र दिउँसो २ बजेतिर बालुवाटार निवासमा फर्किएको अन्यत्र नगएको दाबी गरिएको छ ।
तर सभामुख महराले आफू त्यहाँ गएको र ती महिलासँग बसेर रक्सी खाएको स्वीकार गरेका छन् । महराले आफू महिलाको निवासमा गएको तर विभिन्न सञ्चार माध्यममा आएजस्तो घटना नभएको भनेका छन् ।
सभाुमख महराले ती महिलासँग आफ्नो पुरानो चिनजान रहेको पनि स्वीकार गरेका छन् । उनले ती महिलासँग आउजाउ हुनेगरेको र आफ्नी साथीसँगै विद्यार्थी भएको बताएका छन् । भिडियोमा महराले शरीरमा निलडाम हुने गरि कुटपिट समेत गरेको भनिएपनि उनले उक्त कुरा पहिलाको हुनसक्ने तर आइतबार त्यसो नगरेको बताएका छन् ।
ती महिलाले पनि पटक पटक उनले करणीको प्रयास गरेको आरोप लगाएकी थिइन् ।