नेपाल धितोपत्र बोर्डले सिद्धार्थ क्यापिटललाई गल्ति नदोहोर्याउन सचेत गराएको छ । बोर्डले अबका दिनमा गल्ति नदोहोर्याउन, सचेत भई कार्य गर्न र सजग रहनको लागि क्यापिटललाई निर्देशन दिएको हो ।
सिद्धार्थ क्यापिटल योजना ब्यबस्थापक रही संचालनमा आएको सिद्धार्थ इक्विटी ओरियन्टेड स्किम नामक म्युचल फण्डको रकम फिर्ता गर्दा क्यापिटलले लापरवाही गरेको गुनासो आएपछि बोर्डले क्यापिटललाई प्रष्टीकरण सोधेको थियो । जवाफमा क्यापिटलले आफ्नो तर्फबाट केहि मानवीय र प्राविधिक कमजोरी भई गल्ति भएको स्वीकार गरेको पत्र बोर्डमा पठाएको थियो । बोर्डका प्रबक्ता निरज गिरिले गल्ति भएको, गल्ति भएकोमा माफी मागिसकेको र गल्ति सच्चाईसकेको व्यहोराको पत्र क्यापिटलबाट आएको बताए ।
क्यापिटलले नै गल्ति स्वीकार गरेर त्यसलाई सच्चाईसकेकोले उसलाई सचेत रहनको लागि निर्देशन दिइएको प्रबक्ता गिरिले बताए । उनले आगामी दिनमा गल्ति नदोहोर्याउन र सचेत रहनको लागि निर्देशन दिएको बताए ।
सिद्धार्थ क्यापिटलले सिद्धार्थ इक्विटी ओरियन्टेड स्किमको रकम फिर्ता गर्दा केहि लगानीकर्ताको खातामा धेरै र केहीकोमा थोरै रकम पठाएको थियो । पछि क्यापिटलले धेरै रकम पठाईएको लगानीकर्ताको बैंकखाताबाट बढी भएको रकम फिर्ता समेत लगेको थियो । आफ्नो खाताको रकम बिना जानकारी झिकिएको प्रति लगानीकर्तालाई अशन्तुष्टी जनाएका थिए ।