श्रीलंकामा जारी साफ यू–१७ च्याम्पियनसिपमा नेपालले शुक्रबार भारतविरुद्ध सानदार जित निकाल्दै समूह विजेता बनेको छ । समूह विजेता र उपविजेताको टुंगो लाग्ने खेलमा पछि परेको अवस्थामा उत्कृष्ट पूनरागमन गर्दै नेपालले सानदार जित निकालेको हो ।
आजको खेलमा भारतमाथि जित निकालेसँगै नेपाल समूह बी को विजेता बनेको छ ।
नेपालले ६ अंक जोड्दा भारतको ३ अंक मात्र छ । भुटान अंक विहिन रहँदै यसअघि नै बाहिरिएको छ ।
आजको खेलमा सुरुमा नेपाल १–० ले पछि परेको थियो । तर, पहिलो हाफको अन्तिम मिनेटमा बराबरी गोल फर्काएपछि नेपालले दोस्रो हाफमा २ गोल थप्यो । नेपालका लागि सरोज दर्लामी, युनेश बुढाथोकी र सुवास बमले गोल गरे ।
२५ औं मिनेटमा भारतका लागि ड्यानी मेतीको गोलमा भारतले अग्रता लिएको थियो । ४५ औं मिनेटमा सरोजले बराबरी गोल फर्काए ।
त्यसपछि दोस्रो हाफको चौथो मिनेटमा नै युनेशको गोलबाट नेपालले अग्रता लियो । ६७ औं मिनेटमा सुवासले गोल थपेपछि नेपाल जिततर्फ उन्मुख बन्यो ।
त्यसपछि दूबै टोलीबाट गोल नभएपछि खेल नेपालले ३–१ ले जित्यो ।
नेपाल र भारत दूबै पहिलो खेल जित्दै सेमिफाइनल पुगिसकेका छन् ।
समूह एमा आयोजक श्रीलंका, बंगलादेश र माल्दिभ्स छन् । अब समूह एको उपविजेतासँग नेपालले सेमिफाइनल खेल्नेछ ।