फुटबलको सर्वोच्च निकाय फिफाले २०३० विश्वकपलाई ६४ टोलीसम्म विस्तार गर्ने प्रस्तावको अध्ययन गर्ने तयारी गरेको छ। विश्वकपको सयौं वार्षिकोत्सवको अवसरमा उक्त निर्णय गर्न सकिने प्रस्ताव गरिएको फिफाले बिहीबार जनाएको छ।
२०३० विश्वकप स्पेन, पोर्चुगल र मोरक्कोमा आयोजना हुनेछ, भने अर्जेन्टिना, पाराग्वे र उरुग्वेले उद्घाटन संस्करणको सम्झनामा तीन खेल आयोजना गर्नेछन्। यसअघि नै २०२६ मा संयुक्त राज्य अमेरिका, मेक्सिको र क्यानडामा आयोजना हुने विश्वकप ३२ बाट ४८ टोलीसम्म विस्तार भइसकेको छ।
फिफाका प्रवक्ताले मार्च ५, २०२५ मा सम्पन्न फिफा काउन्सिलको बैठकको क्रममा ६४ टोली सम्मिलित गर्ने प्रस्ताव राखिएको जानकारी दिए। उक्त प्रस्ताव फिफा परिषद्का सदस्यले "विविध" एजेन्डा अन्तर्गत राखेका थिए। प्रवक्ताका अनुसार, फिफाले आफ्ना परिषद् सदस्यहरूबाट आएका प्रस्तावहरूको अध्ययन गर्ने जिम्मेवारी बहन गर्ने भएकाले यसबारे विस्तृत विश्लेषण गरिनेछ।
न्यूयोर्क टाइम्सका अनुसार, उरुग्वे प्रतिनिधि इग्नासियो अलोन्सोले बैठकमा प्रस्ताव राखेका थिए, तर उक्त प्रस्तावप्रति बैठकमा सहभागी सदस्यहरूले 'स्तब्ध मौनता' देखाएको बताइएको छ।
फिफाको अन्तिम निर्णय वित्तीय, राजनीतिक तथा खेलकुद रणनीतिक हिसाबले प्रभावित हुने सम्भावना रहेको बताइएको छ। न्यूयोर्क टाइम्सले तीन जना सहभागीको हवाला दिँदै "फिफाले आर्थिक तथा राजनीतिक फाइदालाई ध्यानमा राख्दै अन्तिम निर्णय गर्ने सम्भावना छ" भनेको छ।
फिफा अध्यक्ष जियानी इन्फान्टिनोले उक्त प्रस्तावलाई "रुचिकर" भन्दै थप अध्ययन गर्नुपर्ने धारणा व्यक्त गरेका छन्। बैठकमा सहभागी चार व्यक्तिहरूको अनुसार, फिफाले प्रस्तावको विस्तृत समीक्षा गर्ने तयारी गरिरहेको छ।
.gif)
.gif)
