इन्टरनेट ब्याण्डविथ आयात गरेबापत नेपालबाट मासिक ६० लाख ७५ हजार अमेरिकी डलर बाहिरिने गरेको छ । जसलाई आजको मितिमा हेर्दा झन्डै ८० करोड नेपाली रुपैयाँ बराबर हुन्छ । नेपालमा भएका विभिन्न इन्टरनेट सेवाप्रदायक कम्पनीमार्फत इन्टरनेट ब्याण्डविथ खरिदका लागि उक्त रकम देश जाने गरेको हो ।
दुरसञ्चार प्राधिकरणका अनुसार नेपालबाट हाल करिब १३५० जीबी इन्टरनेट ब्याण्डविथ मासिक रुपमा खरिद हुँदै आएको छ । जसका लागि ६० लाख ७५ हजार अमेरिकी डलर (करिब ८० करोड नेपाली रुपैयाँ) भुक्तानी हुने गरेको देखिन्छ ।
यसरी सेवाप्रदायकहरुले अन्तर्राष्ट्रिय बजारबाट इन्टरनेट ब्याण्डविथ खरिद गर्दा प्रतिएमबीपीएस औसत ४.५० अमेरिकी डलर (करिब पाँच सय ८६ रुपैयाँ) का दरले नेपालमा इन्टरनेट ब्यान्डविथ आयात गर्ने गरेका छन् । औसतमा हेर्दा वार्षिक ९ अर्ब ६० करोड रुपैयाँ बराबरको रकम नेपालबाट बाहिरिने गरेको छ ।
