इन्टरनेट सेवा प्रदायक कम्पनीले साउन १ गते बुधबारदेखि इन्टरनेटको मूल्य बढाउने भएका छन् । इन्टरनेट सेवा प्रदायकहरुको संस्था (आईएसपिएन)ले इन्टरनेटको मूल्य १३ प्रतिशतले बढाउने निर्णय गरेको हो ।
सरकारले आफूहरुसँगको सहमति कार्यान्वयन नगरेको भन्दै आईएसपिएनले मूल्य बढाउने निर्णय गरेको हो । आईएसपिएनका अध्यक्ष भोजराज भट्टका अनुसार सरकारले इन्टरनेट सेवा प्रदायकहरुबाट १३ प्रतिशत दुरसञ्चार सेवा शुल्क लिने निर्णय व्यवसायीसँगको छलफलका क्रममा नलिने भनेपछि गतवर्ष नै महङ्गिने इन्टरनेटको मूल्य रोकिएको थियो ।
सरकारले इन्टरनेट सेवा प्रदायक कम्पनीलाई १३ प्रतिशत मूल्य समायोजन गर्ने सम्झौता गरेपनि पालना नगरेको भन्दै व्यवसायीले आपत्ति जनाएका छन् । आईएसपिएनले दुरसञ्चार ऐन संशोधन नगरेसम्म व्यवसायीले छुट नपाउने देखिएकाले बाध्य भएर इन्टरनेटको मूल्य बढाउन बाध्य भएको बताएको छ ।