पदयात्रा व्यवसायीको छाता संगठन ट्रेकिङ एजेन्सिज एसोसिएसन अफ नेपाल (टान) को निर्वाचन सोमबार हुँदैछ । बिहान ८ बजे उद्घाटन गरेर सोही दिन बन्दसत्र सहित निर्वाचनसमेत सक्ने तयारी छ । होटल ह्यातमा हुने साधारणसभाको तयारी अन्तिम चरणमा छ ।
टानको आगामी नेतृत्वका लागि त्रिपक्षीय भिडन्त हुने पक्का भएको छ । निर्वाचनका लागि नेकपा एमाले, नेपाली कांग्रेस र नेकपा एकीकृत समाजवादी निकट व्यवसायीहरु मिलेका छन् । यी ३ दल निकट व्यवसायीहरुले निलहरि बाँस्तोलाको अध्यक्षतामा प्यानल नै बनाएर उम्मेदवारी दर्ता गराएका छन् ।
माओवादी केन्द्र निकट व्यवसायीको तर्फबाट कमल सापकोटा अध्यक्षका प्रत्याशी छन् ।
त्यस्तै, स्वतन्त्र व्यवसायीको प्रतिनिधित्व गर्दै बोधराज भण्डारीले पनि प्यानलसहित उम्मेदवारी दर्ता गराएका छन् ।
यस्तो छ बाँस्तोलाका योजना
उनले आफूले व्यवसायीले चाहे जस्तो टान बनाउन नेतृत्वमै बसेर काम गर्न चाहेको बताएका छन् । हाल, व्यवसायीलाई निर्वाचनको समयमा मात्रै खोज्ने गरिएको भन्दै गुनासो बढिरहेका बेला ३ राजनीतिक दल निकट व्यवसायीको तर्फबाट साझा उम्मेदवार बनेका बाँस्तोलाले टानलाई व्यवसायी र व्यवसायीका कम्पनीसँग जोडिएका गाइड पोर्टरहरुको संस्थाका रुपमा स्थापित गर्न चाहेको उल्लेख गरेका छन् ।
उनले आफूले यसअघि २ वर्ष टानको कार्यसमितिमा बसेर काम गरेको र आफूसँग पर्वतीय पर्यटनको क्षेत्रमा २७ वर्ष काम गरेको अनुभव भएकाले आफ्नो अनुभवलाई ट्रेकिङ व्यवसायीहरुको हितमा लगाउन चाहेको पनि बताएका छन् ।
