परराष्ट्रमन्त्री प्रदीप कुमार ज्ञवालीले भारतीय रक्षामन्त्री राजनाथ सिंहसँग भेटवार्ता गरेका छन् । तीनदिने भारत भ्रमणमा रहेका परराष्ट्रमन्त्री ज्ञवालीले शनिबार बिहान भारतीय रक्षामन्त्री सिंहसँग भेटवार्ता गरेका हुन् । भेटवार्तामा परराष्ट्र सचिव भरतराज पौड्याल र भारतका लागि नेपाली राजदूत नीलाम्बर आचार्य पनि सहभागी छन् ।
मन्त्री ज्ञवाली आजै अपरान्ह नेपाल वायु सेवा निगमको विमानमार्फत काठमाडौँ फर्किने कार्यक्रम रहेको भएपनि फर्किनुअघि भारतीय प्रधानमन्त्री नरेन्द्र मोदीसँग भेट्नका लागि प्रयास भइरहेको छ ।
शनिबार बिहान नेपाली दूतावासमा भारतीय पत्रकारहरुसँग अन्तरक्रिया गर्दै मन्त्री ज्ञवालीले नेपालले सुगौली सन्धिलगायत ऐतिहासिक प्रमाणका आधारमा नयाँ नक्सा प्रकाशित गरेको जानकारी गराएका छन् ।