नेपाल कम्युनिष्ट पार्टी नेकपा (प्रचण्ड–माधब) समूहका स्थायी कमिटी सदस्य योगेश भट्टराईले प्रधानमन्त्री केपी शर्मा ओलीले असंवैधानिक कदम चालेको बताएका छन् । प्रेस सङ्गठन नेपाल रामेछापले सदरमुकाम मन्थलीमा आयोजना गरेको पत्रकार भेटघाट कार्यक्रममा नेता भट्टराईले प्रतिनिधिसभा विघटन असंवैधानिक कदम भएको जिकिर गरे ।
‘प्रधानमन्त्रीको कदम असंवैधानिक, अलोकतान्त्रिक र प्रतिगामी छ’ नेता भट्टराईले भने, ‘नेपाली क्रान्तिले प्राप्त गरेका राजनीतिक उपलब्धि नै समाप्त गर्ने खालको प्रधानमन्त्रीको यो कदमले प्रतिक्रान्ति निम्त्याउने खतरा छ । संसद विघटनको कदमले संविधानसभाबाट प्राप्त नेपालको संविधानलाई नै क्षतविक्षत बनाएको छ ।’
उनले नेपालको संविधान २०७२ ले प्रधानमन्त्रीलाई संसद भंग गर्ने कुनै पनि विशेषाधिकार नदिएको दाबी गरे ।