महानगरपालिका र उपमहानगरपालिकाको भागवण्डा मिलाउन बसेको सत्ता गठबन्धनको बैठक निष्कर्षबिहिन भएको छ । प्रधानमन्त्री शेरबहादुर देउवाको सरकारी निवास बालुवाटारमा स्थानीय तहको उम्मेदवारीका विषयमा सोमवार बिहानैदेखि छलफल चलेको थियो ।
उच्चस्तरीय संयन्त्रका संयोजक रामचन्द्र पौडेलको संयोजकत्वमा बसेको बैठकले महानगर र उपमहानगरको उम्मेदवारी टुंगो लगाउने बताइए पनि बैठक बिना निष्कर्ष सकिएको हो । आज साँझ फेरि बैठक बसेर सहमतिको प्रत्यास गरिने बताईएको छ ।
बैठकमा उच्चस्तरीय समितिका १० सदस्यसहित गठबन्धनका शीर्ष नेताहरू उपस्थित रहेका थिए । कांग्रेका सभापति तथा प्रधानमन्त्री देउवा, माओवादी केन्द्रका अध्यक्ष पुष्पकमल दाहाल 'प्रचण्ड' र वरिष्ठ नेता नारायणकाजी श्रेष्ठ, नेकपा एकीकृत समाजवादीका अध्यक्ष माधवुकमार नेपाल र महासचिव वेदुराम भुसाल, जनता समाजवादी पार्टीबाट उपेन्द्र यादवलगायत शीर्ष नेताहरू सहभागी थिए।
६ महानगर र १३ उपमहानगरमा गठबन्धनका पाँचै दलहरूले आ-आफ्नो दाबी गरिरहेका छन् । नेपाली कांग्रेसकै कतिपय नेताहरू स्थानीय तहको चुनावमा तालमेल गर्न नहुने बताइरहेको अवस्थामा उम्मेदवारी टुंगो लगाउने विषय पेचिलो बनेको छ ।