युवा स्वरोजगार कोषका कार्यकारी अध्यक्ष डा. कल्याण रोकाले अहिले भइरहेको बैंकको मर्जरले पछि समस्या निम्त्याउने बताएका छन् । काठमाडौँमा आयोजित 'अर्थतन्त्रका चुनौती तथा समाधानका उपाय विषयक अन्तरक्रिया कार्यक्रममा उनले यस्तो बताएका हुन् ।
उनले अहिले बैंक मर्जरको लहर चलेको तर मर्जरको नाम ठूलो माछाले सानो माछा निलेको निल्यै गर्ने काम मात्र गरेको बताए । अहिले बैंकको संख्या घट्दा राम्रो जस्तो देखिने भएपनि भविष्यमा यसले बैंकिङ क्षेत्रमा मनोपोली बजारको सिर्जना गर्ने उनले बताए ।
उनले अहिलेको अर्थ नीति नै गलत भएको टिप्पणी गरेका छन् । विनोद चौधरीको मात्रै आम्दानी बढिरहने अर्थ नीतिले देश नबन्ने उनले बताए । उनले एडम स्मिथको अर्थशास्त्रको नीतिले विश्वभरी नै काम गर्न छोडेकोले अब समय अनुसार नीति परिमार्जन गरेर अगाडी बढ्नु पर्ने बताए । उनले २०६५ सालमा बनेको युवा स्वरोजगार कोषको कानुन अनुसार अहिले काम गर्नै सकिने अवस्था नरहेको उल्लेख गरे । सोहि कारण उद्यमशीलता र स्वरोजगार क्षेत्र लठिबद्र रहेको उनको भनाई थियो ।