राष्ट्रियसभा सांसद डा. बिमला राई पौडेलले प्रहरीले बोल्नेको मुख थुन्न मिल्छ कि मिल्दैन भन्दै सरकारलाई प्रश्न गरेकी छिन् । आजको राष्ट्रिय सभा बैठकको शुन्य समयमा आफ्नो भनाई राख्दै उनले प्रहरीले बोल्न खोज्ने युवाहरुको मुख थुनेको विषयमा सरकारको ध्यानकर्षण गराउंदै गृहमन्त्रीको जवाफ माग गरेकी हुन् ।
उनले बैठकमा भनिन् ' हिजोदेखि सामाजिक संजाल र संचारमाध्यमहरुमा केहि युवाहरु बोल्न खोजेको, केहि प्रहरीले युवाहरुको जबर्जस्ति मुख थुनिदिएको, घाँटी न्याकिरहेको, लछारपछार पारिरहेको , तस्विरहरु जताततै देख्न पाईएको छ। यो किन भएको हो, युवाहरुले के बोल्न खोजेका थिए. जसको कारण प्रहरीले त्यस्तो ज्यादती गरेको हो। संविधानले स्वतन्त्रपुर्वक विचार राख्न पाउने बोल्न पाउने अधिकारी सबै नागरिकलाई दिएको छ। प्रहरीले बोल्नेको मुख थुन्न मिल्छ कि मिल्दैन ? यस्तो गर्ने प्रहरीलाई गृह मन्त्रालयले कारवाही गरेको छ कि छैन , गृहमन्त्रालयको ध्यानाकर्षण गराउदै गृहमन्त्रीसँग जवाफ माग गर्न चाहन्छु ।'
मंगलबार प्रधानमन्त्री सहभागी एक कार्यक्रममा मिटरब्यजी विरुद्द नारा लगाउने युवाहरुको प्रहरीले मुख थुन्दै उनीहरुलाई पक्राउ गरेको थियो । सोहि विषयमा आज संसदमा आवाज उठेको हो ।
