बिहिबार चर्चित व्यक्तिहरू एवं कम्पनीका ट्विटर खाताहरू ह्याक भएको छ । पूर्वअमेरिकी राष्ट्रपति बराक ओबामा, राष्ट्रपतिका लागि डेमोक्र्याटिक उमेद्दवार जो बाइडन, अर्बपतिहरू जेफ बेजोस, एलन मस्क, बिल गेट्स, माइकल ब्लुमवर्ग, र्यापर कानिय वेस्ट, र कम्पनीहरुमा उबर र एपल लगायतको ट्वीटर खाता ह्याक भएको हो ।
ह्याकरहरुले ति खाता ह्याक गर्दै मानिसहरूलाई एक हजार डलरको क्रिप्टोकरेन्सी चन्दास्वरूप पठाउन भनेका थिए । त्यसको बदलामा २ हजार डलर फिर्ता दिने उल्लेख थियो। "मलाई सबैले अरूलाई दिन आग्रह गर्ने गरेका छन्, र अहिले त्यो समय आएको छ," बिल गेट्सको ट्विटर खातामा राखिएको झुटा ट्वीटमा लेखिएको थियो, "१,००० डलर पठाउनुस्, म तपाईँलाई २,००० डलर पठाउँछु।" टेस्ला र स्पेश एक्स कम्पनीका प्रमुख एलन मस्कको आधिकारिक ट्विटरमा 'आउँदा केही घन्टामा' दिइएको डिजिटल वालेटको ठेगानामा पठाइने जतिपनि बिटक्वाइनको भुक्तानी दोब्बर हुने लेखिएको थियो।
यसरी आग्रह गरिएपछि सो बिटक्वाइन खातामा अहिलेसम्म १ लाख डलर जम्मा भएको बताइएको छ।
ट्विटरमा अहिलेसम्मकै ठूलो हमला ठानिएको यस घटनालाई उक्त सोसल मिडिया कम्पनीले अनुसन्धान गरिरहेको जनाएको छ। ट्विटरले ति झुटा ट्विट डिलिट गरेको , तथा ति खाताको फिचरहरु सिमित गरी अनुसन्धान गरिरहेको जनाएको छ।