युनियन बैंक अफ स्विजरल्याण्ड, 'युबिएस' ले सवा ३ अर्ब अमेरिकी डलरमा क्रेडिट स्विस बैक प्राप्ति गर्ने भएको छ। यस अगाडी प्रस्ताव गरिएको एक अर्ब अमेरिकी डलर अस्विकार गरेपछि युबीएसले अर्को सवा अर्ब अमेरिकी डलर थपेर क्रेडिट स्विस किन्न तयार भएको हो। सवा ३ अर्ब अमेरिकी डलरको प्रस्ताव स्वीकार गरेसँगै १६७ बर्ष पुरानो क्रेडिट स्विस बैंक सँधैको लागि विलय हुने भएको छ।
तर यो प्राप्ति सम्झौता हुँदा बैंकको बन्डमा लगानी गरेका लगानीकर्तालाई भने हालसम्म कै धेरै घाटा भएको छ । प्राप्ति सम्झौता हुँदा बैंकको अतिरिक्त टायर १ बन्ड लाई शुन्य बनाउने सहमति भएसँगै अतिरिक्त टायर १ बन्डमा लगानी गरेकाहरुले लगानीको सम्पूर्ण रकम गुमाएका हुन्। बैंकको कोर क्यापिटललाई बढाउँनको लागि नियामक कै निर्देशनमा बैंकको अतिरिक्त टायर १ बन्ड लाई शुन्य बनाउने सहमति भएको ब्लुमबर्गले उल्लेख गरेको छ । यसबाट १७.३ अर्ब डलर बराबरको बन्डको भ्यालु शुन्यमा झरेको छ ।
ब्लुमबर्गका अनुसार अतिरिक्त टायर १ बन्डमा सबैभन्दा धेरै जोखिम हुन्छ । तर प्रतिफल पनि अन्यको तुलनामा बढी नै हुन्छ । क्रेडिट स्विस बैंकको हकमा भने बन्ड नै पुरै 'राइट अफ' गरिएसँगै बन्डमा लगानी गरेकाहरुले केहि पनि पाउने छैनन् ।
युरोपको अतिरिक्त टायर १ बन्डको बजार २७५ अर्ब डलर बराबरको रहेको छ। क्रेडिट स्विस बैंकको १७.३ अर्ब डलर बराबरको अतिरिक्त टायर १ बन्ड शुन्य हुनु युरोपको बन्ड मार्केटको हालसम्मकै ठूलो घाटा भएको बताईएको छ। यस अघि सन् २०१७ मा स्पेनको बैंको पपुलर एसए बैंकको १.४४ अर्ब डलर बराबरको अतिरिक्त टायर १ बन्ड 'राइट अफ' गरिएको थियो । त्यसपछि युरोपको तिरिक्त टायर १ बन्डको बजारको इतिहास मै क्रेडिट स्विस बैंकको राइट अफ हालसम्मकै ठूलो घाटा हो ।
ब्लुमबर्गका अनुसार ग्लोबल फाइनान्सियल क्राइसिसपछि युरोपमा अतिरिक्त टायर १ बन्डको सुरुवात भएको थियो । यस्तो बन्डले बैंकहरु जोखिममा पर्दा 'शक अब्जर्बर'को भूमिका खेल्ने अपेक्षा गरिएको थियो ।
क्रेडिट स्विस बैंकको बन्डका लगानीकर्ताले ठूलो घाटा बेहोरेपछि अन्य बैंकका अतिरिक्त टायर १ बन्डको बिक्री ह्वात्तै बढ्ने र त्यसले युरोपको अतिरिक्त टायर १ बन्डको बजारमा ठूलो हलचल ल्याउन सक्ने बताईएको छ ।
स्विजरल्याण्डको विकासको लागि सबैतिर ट्रान्सपोर्टेसन हुनुपर्ने र त्यसको पहिलो विकल्प 'रेल' र यसको लागि पुंजी चाहिने भएपछि सन् १८५६ मा क्रेडिट स्विस बैंकको जन्म भएको थियो। युबिएसले सुरुमा १ बिलियन डलरमा क्रेडिट स्विस बैंकलाई प्राप्ति गर्नको लागि प्रस्ताव गरेको थियो । बैंकले सो प्रस्ताव अस्विकार गरेपछि युबिएसले नयाँ प्रस्ताव गर्दै बैंकलाई प्राप्ति गरेको हो ।
युनियन बैंक अफ स्विजरल्याण्ड २४ बर्ष अगाडी युनियन बैक अफ स्विजरल्याण्ड र स्विस बैंक कर्पोरेशन मिलेर बनेको बैंक हो। यद्दपी युनियन बैक अफ स्विजरल्याण्ड र स्विस बैंक कर्पोरेशन पनि धेरै बैंकहरु मिलेर बनेका बैंक हुन्। यसको ओरिजिनल रुट भने १७४७ मा स्थापना भएको बैंक राग्गाजीसँग जोडिन्छ।
यस अघि अमेरिकामा दुई वटा बैंक डुबेका थिए । ति बैंक त्यहाँका स्थानीय बैंक थिए। १६७ बर्ष अगाडी स्थापना भएको क्रेडिट स्विस बैंक भने मल्टीनेशनल बैंक हो । विश्वका महत्वपूर्ण ३० बैंकको सूचीमा यो बैंक पनि पर्ने अल जजिराले उल्लेख गरेको छ। बैंकको ५० देशमा १५० कार्यालय रहेका छन् ।
