.gif)
अमेरिकाको केन्द्रीय बैंक फेडरल रिजर्भ(फेड) ले ०.५० प्रतिशत विन्दुले ब्याजदर कटौती गरेको छ । फेडरल ओपन मार्केट कमिटी (एफओएमसी)ले हालको सन्दर्भ ब्याजदरमा ०.५० प्रतिशत कटौतीको निर्णय गरेको हो ।
यो ब्याजदर कटौतीपछि अटो लोन, होम लोन, क्रेडिट कार्ड तथा बिजनेस लोन सस्तो पर्न जानेछ ।विश्वव्यापी कोरोना महामारी शुरुवात भएको चार वर्षपछि फेडले पहिलो पटक ब्याजदर कटौती गरेको हो । यो निर्णयपछि फेडरल ब्याजदर ४.७५ देखि ५ प्रतिशतसम्मको सीमामा झरेको छ । यसअघि यस्तो दर ५.२५ देखि ५.५० प्रतिशतको सीमामा थियो ।
बेरोजगार दर र मूल्यवृद्धि दुवैमा आशलाग्दो परिणाम देखिन थालेपछि फेडले ब्याजदर कटौतीको निर्णय गरेको सीएनबीसी ले आफ्नो वेबसाइटमा समाचार छापेको छ । खासगरि ब्याजदर कटौतीले श्रम बजारको मन्दी थप घटाउने उसको दाबी छ ।
त्यहाँ बढ्दो बेरोजगारीदर र सुस्त अर्थतन्त्रका कारण गत जुलाई महिनादेखि फेडलाई ब्याजदर कटौती गर्न दबाब सृजना भएको थियो । यो कटौतीपछि मूल्यवृद्धिमा थप जोखिम नदेखिएमा सन् २०२४ को अन्त्यतिर थप ०.५० प्रतिशत विन्दु ब्याजदर कटौती हुन सक्ने अनुमान छ ।ब्याजदर कटौतीले अमेरिकी नागरिकमात्र नभएर डलरसँग जोडिएका विश्वका केन्द्रीय बैंकहरु जस्तै हङकङ र अन्य खाडीका देशहरु यो निर्णयबाट प्रभावित हुनेछन् ।
‘बेरोजगारीको कुनै जटिल समस्याविना नै मूल्य स्थिरतातिर उन्मुख छौं, यसले देखाउँछ कि हामी मूल्यवृद्धि र बेरोजगार दुवै समस्यालाई सही रुपमा सम्बोधन गर्न सक्षम रहन्छौं’ कमिटीको निर्णयपछि फेडका अध्यक्ष जेरोम एच पावेलले पत्रकार सम्मेलनमा भनेका छन् ।
त्यसैले यी देशका ऋणीहरुमा समेत फेडको ब्याजदरको कटौतीको असर पर्नेछ । यो निर्णयले अमेरिकी धितोपत्र बजारमा लगानी गरेका अन्य देशका लागननीकर्ता लाभान्वित हुनेछन् ।
ब्याजदर परिवर्तनले अमेरिकी उत्पादनको लागत तथा मूल्य, कच्चा तेल, सुन, मुद्रा विनियमदरजस्ता विषयलाई प्रत्येक्ष प्रभाव पर्ने भएकाले यसको असर नेपालसहित अरु मुलुकहरूमा पनि पर्न जान्छ ।एजेन्सीहरु
