अमेरिकी राष्ट्रपति डोनाल्ड ट्रम्पले बुधबारदेखि विभिन्न देशहरूमाथि नयाँ आयात शुल्क (ट्यारिफ) लागू गरेका छन्। विशेषगरी चीनबाट आयात हुने वस्तुहरूमा १०४ प्रतिशतसम्मको उच्च शुल्क लगाइएको छ, जुन हालसम्मकै कडा आयात करको रूपमा हेरिएको छ।
राष्ट्रपति ट्रम्पले “पारस्परिक व्यापार” को आधारमा यस्तो निर्णय लिएको दाबी गरेका छन्। उनले विभिन्न देशहरूले अमेरिकाली उत्पादनमाथि लगाउँदै आएका शुल्कहरूको जवाफस्वरूप नयाँ ट्यारिफ नीतिहरू अघि सारेका हुन्।
यस कदमले दशकौँदेखिको विश्व व्यापारको संरचनामा धक्का पुर्याएको छ। अन्तर्राष्ट्रिय विश्लेषकहरूका अनुसार अमेरिकी नीतिले व्यापार युद्धलाई झन् चर्काउने जोखिम बढेको छ। यसको असरले विश्वव्यापी आर्थिक मन्दीको डरसमेत पैदा गराएको छ।
नयाँ ट्यारिफ लगाइएसँगै विश्वका शेयर बजारहरूमा तीव्र गिरावट आएको छ। चिनियाँ बजारसँगै युरोप र अमेरिका स्वयंको बजारमा पनि नकारात्मक असर देखिएको छ।
यसबीच, जापान, दक्षिण कोरिया र भियतनामले अमेरिकासँग व्यापारसम्बन्धी वार्ता गर्न तयारी थालेका छन्। यी देशहरू अमेरिकासँगको व्यापार सम्बन्ध बिग्रन नदिन द्विपक्षीय संवादमार्फत समाधान खोज्न इच्छुक देखिएका छन्।
ट्रम्प प्रशासनले भने, यस्तो नीतिले अमेरिकी उद्योगलाई सुरक्षा दिने, रोजगार सिर्जना गर्ने र घरेलु उत्पादन बढाउने लक्ष्य राखेको छ। तर अन्तर्राष्ट्रिय समुदायले यसलाई संरक्षणवादी कदम भन्दै आलोचना गरिरहेको छ।
.gif)
.gif)
