आइतबार भारतको नयाँदिल्ली उड्न ठिक्क
परेको नेपाल एयरलाइन्सको जहाज त्रिभुवन अन्तराष्ट्रिय विमानस्थलले रोक्यो । दिउँसो
१०:४५ बजे २५४ जना यात्रु लिएर भारतको दिल्ली उड्न तयार भएको नेपाल एयरलाइन्सको
वाइडबडीको आरए–२१७ उडान एयरपोर्टले रोकेको हो ।
नेपाल नागरिक उड्डयन प्राधिकरण (क्यान)ले
अन्तराष्ट्रिय उडानको तालिका स्वीकृत गर्ने क्रममा अक्टोबर ३० देखि मार्च २७
सम्मको तालिका अनुसार निगमको आइतबार र शुक्रबार दिउँसो १०:४५ बजे हुने
काठमाडौँ–दिल्ली उडान कटौती गरेपछि हिजो आइतबारको उडान रोकिएको हो ।
विवादको चुरो
कुरो के हो ?
साउन १९ गते तत्कालिन पर्यटनमन्त्री
प्रेम आलेको सिफारिसमा नेपाल एयरलाइन्सका अध्यक्ष युवराज अधिकारीलाई
मन्त्रिपरिषदको बैठकले बर्खास्त गरेको थियो । त्यसअघि उनीमाथि छानबिन गर्न समिति
बनाइएको थियो । छानबिन समिति बनेपछि अधिकारी निलम्बनमा परेका थिए ।
तर, निलम्बनको
निर्णय विरुद्द उनी अदालत गएका थिए ।
साउन १९ गते सरकारले बर्खास्त गरेकै
दिन सर्वोच्च अदालतले निगमका कार्यकारी अध्यक्षलाई कारबाही नगर्न आदेश दियो ।
त्यसपछि अधिकारी कार्यालय जान थाले ।
तर, अदालतबाट ‘स्टे
अर्डर’ लिएर फर्किएपछि तत्कालिन पर्यटनमन्त्री प्रेम आले र उनको सम्बन्ध झन झन
चिसियो । आलेले अपशब्द प्रयोग गर्दै अध्यक्ष अधिकारीमाथि हातपात नै गरेको अडियो र
केही फुटेज भिडियोहरु नै सार्वजनिक भए । आले आफैँले जोड गरेर निगमको अध्यक्षमा
अधिकारीलाई नियुक्त गरेका थिए । तर, कालान्तरमा दुई बीच सम्बन्ध चिसिन
पुग्यो ।
आले मन्त्रीबाट हट्नासाथ पर्यटनमन्त्री
बने नेकपा एकिकृत समाजवादीका जीवनराम श्रेष्ठ । श्रेष्ठ र आले एउटै पार्टीमा छन् ।
उता नेपाल नागरिक उड्ययन प्राधिकरण (क्यान)को महानिर्देशक पनि आलेले नै बनाएका
व्यक्ति हुन् । प्रदीप अधिकारीलाई आलेले सबैतिर मिलाएर क्यानको महानिर्देशक बनाएका
थिए ।
अहिले मन्त्री श्रेष्ठसँग क्यानका
महानिर्देशक अधिकारीको सम्बन्ध सुमधुर छ । यसको तादातम्यता सबै आलेले नै
मिलाइदिएका थिए । आले र निगम अध्यक्ष अधिकारीको विगतको विवाद अहिले मन्त्री श्रेष्ठले
आफ्नो र अधिकारीको विवादका रुपमा लिएका छन् । उनले जसरी पनि अधिकारीलाई ‘घुडा
टेकाउने’ रणनीति लिएको निकटस्थ स्रोतले आधारसहित जानकारी गराएको छ । यसका लागि
मन्त्री अधिकारीलाई आलेले घुमाइरहेको दाबी पनि स्रोतले गरेको छ ।
निगमका कार्यकारी अध्यक्ष अधिकारीलाई
घुडा टेकाउन अहिले मन्त्री श्रेष्ठले क्यानका महानिर्देशक प्रदीप अधिकारीलाई
प्रयोग गरेको दाबी स्रोतको छ । पर्यटन तथा नागरिक उड्डयनमन्त्री श्रेष्ठकै
निर्देशनमा क्यानका महानिर्देशक अधिकारीले आइतबारको नेपाल एयरलाइन्सको दिल्ली उडान
रोकिदिएको दाबी पनि स्रोतले गरेको छ ।
ध्वजाबाहकको
उडान कटौती गरेर अधिकारीले भारतीय वायुसेवा कम्पनी इन्डिगो र भिस्ताराको भने उडान
संख्या थपिदिएका छन् । अधिकारीमाथि विदेशी वायुसेवा कम्पनीबाट मोटो रकम लिएर
राष्ट्रिय ध्वजाबाहकलाई धरासायी बनाउन खोजेको आरोप क्यानकै अधिकारीहरूले लगाएका
छन् ।
निगमको टोलीलाई
मन्त्रीले झपारे
क्यानबाट भैरहवा उडान सुरु गर्न भन्दै
निगमलाई पत्र गएको थियो । निगमले क्यानलाई उत्तर पठाउँदै डिसेम्बर २२ भित्र उडान
गर्न तयारी भइरहेको र अहिले तत्काल जान नसकिने ब्यहोराको जवाफ दियो ।
यस लगत्तै निगमको एउटा टोली अहिले काठमाडौँबाट
भइरहेको उडान यहीँबाट गर्ने र डेढ महिनामा भैरहवाबाट उडान गर्ने जानकारी बोकेर
पर्यटनमन्त्री श्रेष्ठ समक्ष पुग्यो । तर, मन्त्री श्रेष्ठले काठमाडौँबाट भइरहेको
निगमको उडान कटौती हुने भन्दै निगमको टोलीलाई झपारेर फर्काए ।
लगत्तै, त्रिभुवन विमानस्थलले यात्रुले बोर्डिङ पास लिइसकेको अवस्थामा आइतबार दिल्ली जान ठिक्क परेको निगमको जहाज रोकेको हो ।
लहड र सनकको भरमा निर्णय
निगमका आधिकारिक ट्रेड युनियनका अध्यक्ष सुवास डाँगीले अधिकारीको यो निर्णय लहड र सनकको भरमा आएको टिप्पणी गरे । बिजपाटीसँग कुरा गर्दै डाँगीले भने, '८/८ महिना अघि काटेको टिकट अलपत्र परेको छ । निगमको इतिहासमा अहिलेसम्म यस्तो भएको छैन ।'
हरेक हप्ता ४ वटा फ्लाइट बन्द गर्ने अधिकारीको निर्णयले वायुसेवा निगमको करोडौं क्षति भएको उनले बताए । 'कहीं न कहीं आर्थिक प्रलोभन पाएपछि अधिकारीले वायुसेवा निगमलाई ध्वस्त बनाउन लागेको हाम्रो अनुमान छ,' उनले भने, 'एकातिर यात्रुले दुख पाए । अर्कोतिर ध्वजावाहक विमानको अन्तर्राष्ट्रिय साख गिर्यो ।'
तर अधिकारीले भने वायुसेवाको उडान कटौतीलाई अन्य अन्तर्राष्ट्रिय कम्पनीको उडान थपसँग जोड्न नमिल्ने दाबी गर्छन् । उनले बिजपाटीसँग भने, 'भैरहवा अन्तर्राष्ट्रिय विमानस्थलमा उडान संख्या थप्न क्यानले गरेको अनुरोधलाई वायुसेवाले अटेरी गरेको हो । यसमा विदेशी वायुसेवा कम्पनीले गरेको उडान संख्या थपसँग कुनै सम्बन्ध छैन ।'