निर्जीवन बीमाको ६० प्रतिशत हिस्सा मोटर बीमालेखले ओगटेको छ । नेपाल बीमा प्राधिकरणले जारी गरेको तथ्यांकमा निर्जीवन तर्फ ६०.०२ प्रतिशत हिस्सा मोटरको बीमाले ओगटेको पाइएको छ ।
चालु आर्थिक वर्षको ५ महिनामा निर्जीवन तर्फ कुल ११ लाख ७२ हजार ४४७ वटा पोलिसि विक्री भएका छन् । जसमध्ये ७ लाख ३ हजार ७८५ वटा मोटर अन्तर्गतको पोलिसि विक्री भएको हो । जुन ६०.०२ प्रतिशत हिस्सा हो । १४ वटा निर्जीवन र २ वटा लघु निर्जीवन बीमा कम्पनीले उक्त पोलिसिहरु विक्रि गरेका हुन् ।
त्यसैगरी, सम्पत्ती बीमाको हिस्सा १७.८८ प्रतिशत रहेको छ । यो अवधिमा सम्पत्ती अन्तर्गत २ लाख ९ हजार ६८२ वटा पोलिसि विक्री भएको छ । यसैगरी, ९.३९ प्रतिशत हिस्सा ओगटेको सामुद्रिक तर्फ १ लाख १० हजार १२२ वटा पोलिसि विक्री भएको तथ्यांकमा उल्लेख छ ।
यसैगरी, कृषि तर्फ ५६ हजार ६४१, लाघु तर्फ १७ हजार ४८७, ईन्जिनियरिङ्ग तर्फ ७ हजार ९७६ र हवाई तर्फ ५० वटा पोलिसि विक्री भएको प्राधिकरणले जनाएको छ ।