आर्थिक वर्ष २०७७/०७८ को तुलनामा आर्थिक वर्ष २०७८/०७९ मा नेपाल एयरलाइन्सको घाटा चुलिएको छ । तर, निगमका अध्यक्ष युवराज अधिकारी भने बुधबारदेखि आम्दानी बढेको झुटो प्रचार गराउन ब्यस्त छन् ।
अध्यक्ष अधिकारीले नेतृत्व लिएपछि निगमको घाटा बढेको छ । तर, उनले नाफा बढेको समाचार लेखाईरहेका छन् ।
आर्थिक वर्ष २०७७/०७८ मा ३ अर्ब ६६ करोड ३० लाख ३९ हजार ५४४ रुपैयाँ रहेको निगमको घाटा आर्थिक वर्ष २०७८/०७९ मा बढेर ४ अर्ब ७९ करोड ३ लाख १४ हजार ३ सय रुपैयाँ पुगेको छ । एक वर्षमै निगमको घाटा १ अर्ब १३ करोडले बढेको छ ।
अनावश्यक खर्च गरेर घाटा बढाएका अध्यक्ष अधिकारी नाफा बढेको भन्दै प्रचारमा लागेको देखेपछि निगमका कर्मचारी छक्क परेका छन् । अधिकारीले आफू अध्यक्ष भएपछि करारमा मात्रै १ सय बढी कर्मचारी भर्ती गरेका छन् ।