नेपाल इन्भेष्टमेण्ट बैंक लिमिटेड (एनआइबीएल) ले ‘बैंक अफ द इयर–२०२२’ अवार्ड पाएको छ। लण्डनस्थित दि फाइनान्सियल टाइम्सले बैंकलाई उक्त अवार्ड प्रदान गरेको हो। बिहीबार बेलायतको लण्डनमा आयोजित सवार्ड समारोह कार्यक्रममा पुगेर बैंकका अध्यक्ष पृथ्वीबहादुर पाण्डे र प्रमुख कार्यकारी अधिकृत ज्योति प्रकाश पाण्डेले उक्त अवार्ड ग्रहण गरेका हुन्।
फाइनान्सियल टाइम्स लण्डनबाट प्रकाशित दैनिक समाचार पत्र हो। यसले हरेक वर्ष बैंक अफ द अवार्ड घोषणा गर्दै आएको छ। एनआइबीएलले उक्त अवार्ड पाएकोमा सिईओ पाण्डेले गौरवान्वित महशुस गरेको बताए। एनआइबिएलले विगत २ दशकमा बैंकिङ उद्योगको प्रतिष्ठित अवार्ड जितेको यो छैटौं पटक रहेको उनको भनाई छ। उनले अवार्ड जित्नु एनआइबिएलले नेपालको वित्तीय क्षेत्र र समाजमा गरेको महत्वपूर्ण योगदानको प्रमाण रहेको बताए।
उक्त अवार्ड बैंकको स्थिर वृद्धि र कार्यसम्पादन रणनीतिक पहल र प्राविधिक प्रगतिको परिणाम रहेको जनाएको छ। सिईओ पाण्डेका अनुसार बैंकले आफ्ना बृहत ग्राहकवर्गलाई बजारमा माथि उठाउनको लागि नवीन उत्पादन तथा सेवाहरू पनि उपलब्ध गराएको छ । ग्रामीण क्षेत्रको जीवनस्तरमा सुधार गर्दै न्यून ब्याजबाट वञ्चित क्षेत्र कर्जा उत्पादनहरू उपलब्ध गराई समाजका पिछडिएका वर्गहरूलाई वित्तीय पहुँच र समावेशीकरणमा निरन्तर ध्यान केन्द्रित गरेको छ।
एनआइबिएलले विभिन्न ग्रामीण जनसंख्यालाई बैंकिङ सेवाहरूमा पहुँच सशक्तिकरण गर्दै वित्तीय सचेतना र तालिम कार्यक्रमहरू पनि प्रदान गरेको जनाएको छ। सम्भव भएसम्म नेपाली संस्कृति कला र सम्पदाको सशक्त संरक्षण र प्रवर्द्धन गरी संस्थागत सामाजिक उत्तरदायित्व तर्फ उल्लेखनीय योगदान पुर्याएको बैंकको दाबी छ।
एनआइबिएलले ८८ शाखा, १३३ एटिएम, २२ एक्सटेन्सन काउन्टर, १० राजस्व संकलन काउन्टर र ६० ग्रामीण शाखारहित बैंकिङ काउन्टरबाट १० लाख भन्दा बढी ग्राहकहरूलाई सेवा दिँदै आएको छ ।
