सहकारी विभागले कान्तिपुर बचत तथा ऋण सहकारी संस्थालाई समस्याग्रस्त सहकारी घोषणा गर्न सिफारिस गरेको छ । विभागले सोमबार भूमि व्यवस्था सहकारी तथा गरिबी निवारण मन्त्रालयमा पत्र पठाएर कान्तिपुर सहकारीलाई समस्याग्रस्त घोषणा गर्न सिफारिस गरेको हो ।
कान्तिपुर सहकारीका सञ्चालकले बचतकर्ताको करिब ६ अर्ब ५० करोड रुपैयाँ दुरुपयोग गरेको पाइएको छ । यो सहकारीले शाखा तथा सेवा केन्द्र गरी १८ ठाउँबाट सेवा दिँदै आएको थियो । पछिल्लो विवरण अनुसार कान्तिपुर सहकारीमा ७ हजार बचतकर्ता छन् । उनीहरुले ६ अर्ब १३ करोड बचत जम्मा गरेका छन् ।
विभाग स्रोतका अनसार सहकारी ऐन २०७४ को दफा १०४ अनुसार विभागले समस्याग्रस्त घोषणा गर्न मन्त्रालयमा सिफारिस गरेको हो ।
समस्याग्रस्त घोषणा भएपछि सहकारी व्यवस्थापन समितिले सहकारीको नाममा भएको सम्पत्ति रोक्का तथा सञ्चालकहरुको समेत सम्पत्ति रोक्का राखी आफ्नो कारबाही प्रक्रिया अघि बढाउनेछ ।
यो सहकारीका अध्यक्ष हिमालयविक्रम मल्ल ठकुरी हुन् ।