नेपाली कांग्रेसका सभापतिसमेत रहेका
प्रधानमन्त्री शेरबहादुर देउवाको निर्वाचन क्षेत्र डडेलधुरामा सामान वितरण गर्न
महिला, बालबालिका तथा जेष्ठ नागरिक मन्त्री
उमा रेग्मीले उर्दी दिएकी छन् ।
मङ्सिर ४ गते सम्पन्न हुने आसन्न
निर्वाचनमा देउवालाई जिताउने प्रयोजनका निम्ति मन्त्री रेग्मीले एनजीओ र आइएनजीओलाई
डडेलधुरामा पैसा खर्च गर्नैपर्ने दबाब दिने गरेकी हुन् । आफ्नो पदको दुरुपयोग
गर्दै मन्त्री रेग्मीले आइएनजीओ नवीकरण र आयोजना सम्झौता गर्न डडेलधुरामा सामान
वितरण गरेको हुनैपर्ने शर्त तेर्स्याउने गरेकी हुन् ।
समाजकल्याण परिषदको पदेन अध्यक्षसमेत
रहेकी मन्त्री रेग्मीले उपाध्यक्षमा अमेरिका बसिरहेकी आफ्नी बुहारी मोनिका भट्टराईलाई
नियुक्त गराएकी थिइन् । छोरा बिजय रेग्मीलाई मन्त्री रेग्मीले आफ्नो सल्लाहकार
बनाएकी छन् ।
बुहारी र छोराको तजबिजीमा आइएनजीओको
नवीकरण र प्रोजेक्ट एग्रीमेन्टका लागि अनाधिकृत शर्त तेर्स्याइएको हो । नाम चलेको
एक आइएनजीओका प्रमुखले बिजपाटीसँग भने, 'हामीले डडेलधुरामा यो आर्थिक वर्षमा मात्र
३ करोडको सामान बाँडिसक्यौं ।'
उक्त आइएनजीओले सामान बाँड्ने कार्यक्रममा
कांग्रेसका स्थानीय तहका नेताहरूको हालीमुहाली हुने गर्छ । अहिलेसम्म १० वटा भन्दा
बढी आइएनजीओले डडेलधुरामा काम गरिरहेका छन् । त्यहाँ देउवाको गुणगान गाइएपछि मात्र
सामान बाँडिने गरेको छ ।
रेग्मी २०७८ को असोजमा मन्त्री बनेकी
थिइन् । त्यसपछि आफ्ना छोरा बुहारी दुवैलाई अमेरिकाबाट झिकाएर आफ्नो काम फत्ते
गर्न अह्राएकी मन्त्री रेग्मीले पछिल्लो समय आइएनजीओहरूलाई सताउने गरेकी हुन् ।
मन्त्रालयका कर्मचारीहरू भने यसबारे
बोल्न चाहन्नन् । आफ्नो नाम उल्लेख नगर्ने शर्तमा मन्त्रालयका एक उपसचिवले बिजपाटीसँग
भने, 'एकपटक मन्त्रीज्यूले बालुवाटार (प्रधानमन्त्री पत्नी आरजु देउवा)बाट नै दबाब
आउने गरेको बताउनु भएको थियो । हामीसँग त मन्त्रीको निर्देशन मान्नुको विकल्प छैन
।'
देउवा २०४८, २०५१, २०५६, २०६४, २०७० र २०७४ भएको निर्वाचनमा
डडेलधुराबाट विजयी भएका थिए । अहिले पनि उनले सोही क्षेत्रमा मनोनयन दर्ता गराएका
छन् ।